Kon mobawog na gani ang kumpay,
Mga bituon motalidhay,
Duyog sa kagabhion,
Mohulat pod nimog padayon.
Diri sa ko maglingkod-lingkod,
Subang gipayongag panganod;
Diris daplin ko moagik-ik,
Inig singgit unya sa langit –
“Pagdali na kay tili-tili na ra ba!”
Ang tangkay mibawog sa huyop sa hangin.
Ang mga bituon mitalidhay apan wa magpabilin;
Gikaon sa kagabhion, naputos sa dayon…
Padayon gihapon ko sa paghuwat –
Diri magtindog-tindog,
Sipa-sipaon ang tuod
Ug maghandom, mag-ampo,
Nga unta wala ka makalimot nako.