Subayon ko kining palawa nga akong nakit-an.
Dili ko na ipiyong kining akong mga mata.
Dili sama ka gabii, nga wala ta magkita kay napagngan
kos akong sulo. Naupos ang binugkos kong namo
nga duha ka dupa. Karon nga nia na kas akong atubangan,
dili ko na palabyon ang higayon nga maangkon ka.
Nagtuo ko nga napulaw ka gabii og hinulat sa imong bisita.
Wa koy labot kon wala kay tulog og pinaabot sa imong
gilaang, aron masudlan ang imong gadaguok nga tiyan,
aron mapuslan ang imong gambalay.
Nasayod ko nga usa ka ka mangingilad. Dakong mangingilad.
Saksi ang bulan sa imong paghupo-hupo sa mga lumalabay;
sa imong pagtukob sa mga insektong way ngalan;
sa imong pagbugalbugal kanila. Gani, wala gyod kay kaluoy.
Kadtong langaw nga langyaw, wa mo pasayloa. Kadtong
alibangbang nga mao pay paglupad nga napadpad
sa imong panimalay, imong gibiaybiay hangtod
nga mituskig nga nagbitay nga wa nay kinabuhi.
Tan-awa, wa pa gani ka kahipos sa ibos nga imong giputos.
Naingon og Paraon sa Ehipto kanang imong gilumloman
nga gipuyos sa imong palawa. Maayo kay nagkita
ta karong buntaga. Nagputos-putos pod kas imong
kaugalingon aron ingnon. Ayaw na. Klaro na kaayo.
Kanang imong pagpakaaron-ingnon nga biktima.
Kanang imong pagtulog-tulog, duka-duka, sambol
na kaayo sa akong panan-aw. Di na ko kahuwat.
Karon, tan-awon tag di ba ka masaag. Tan-awon tag
makatultol ba kag subay-subay sa dalan-dalan
ning akong palad pauli sa imong pinuy-anan.
Bionote: Si Jovanie Garay, usa ka magtutudlo sa Davao Oriental State University—San Isidro Extension Campus This piece was a runner-up winner in the 2023 Tagik: Tigi sa Pagtagik og Balak, Bohol.
