Category: Poetry

Kasalanan Ka Man sa Mata ng Iba

Poetry by | June 28, 2021

Anak? Ako magkaka-anak?
Hindi, hindi!
Isang malaking kasalanan, isang malaking kamalian.

Kailan? Kailan ba nagsimula?
Ah, oo nga pala!
Isang gabi, puno ng kalungkutan ngunit dala niya’y kasiyahan.

Sino? Sinong ama?
Siya, siya ang ama!
Isang duwag na nang-iwan sa gitna ng gulong kinahantungan.

Sino? Sinong tatanggap?
Sa iyo, sa ating dalawa!
Isang malaking unos tingin ko’y di kayang lampasan.

Kasalanan, ikaw nga ba?
Ah, tayong dalawa!
Isang kahihiyan sa pamilyang matagal nang hindi natin nararamdaman.

Iyak, bakit ka umiiyak?
Malupit, oo malupit!
Isang mundong handa kang husgahan ngunit mailap kung magmahal.

Anak, kasalanan ka man sa mata ng iba,
Sa akin isa kang biyaya.
Wala mang sagot sa mga tanong di na bale basta nandyan ka.

Kasalanan ka man sa mata ng iba,
Anak sana ay magmahal ka.
Maging matapang ka, maging busilak ang kalooban.

Anak? Ako magkaka-anak?
Oo, oo!
Isang malaking biyaya, isang malaking kasiyahan.

Princess Nel-Ann Olo is a language graduate passionate about studying language, reading, and writing. She is from North Cotabato but is now living in Davao City and works as an educator.

Kalinaw

Poetry by | June 28, 2021

Chant: Dyandi……

Dali na, Maghugpong kita magpadayon
Dali na, Tinuod nga kalinaw pandayon

Nisubang na ang adlaw
Nitalidhay ang bangaw
Misilip sa bukid

Gasa nga bidlisiw
Nihalok sa tanaman’
Bahandi alang sa tanan

Chorus:
Lihok katawhan
Uswag Mindanawon
Gugma’g panaghugpong
Makigbisog, padayon
Lihok katawhan
Uswag Mindanawon
Gugma’g panaghugpong
Tinuod nga kalinaw pandayon…

Chant: Dyandi……

Bag-uhon ang kahimtang
Itanom ang binhi sa kagawasan
Ibayaw sa langit ug yuta
Kaangayan tinubdan sa kalinaw
Kaangayan tinubdan sa kalinaw
Kaangayan tinubdan sa kalinaw
Kaangayan tinubdan sa kalinaw

 

Dali na, Maghugpong kita magpadayon
Dali na , Tinuod nga kalinaw pandayon

Nisubang na ang adlaw
Nitalidhay ang bangaw
Misilip sa bukid

Gasa nga bidlisiw
Nihalok sa tanaman’
Bahandi alang sa tanan

Chorus:

Lihok katawhan
Uswag Mindanawon
Gugma’g panaghugpong
Makigbisog, padayon
Lihok katawhan
Uswag Mindanawon
Gugma’g panaghugpong
Makigbisog, padayon
Lihok katawhan
Uswag Mindanawon
Gugma’g panaghugpong
Makigbisog, padayon
Lihok katawhan
Uswag Mindanawon
Gugma’g panaghugpong
Tinuod nga kalinaw pandayon…

Coda:

Kaangayan tinubdan sa kalinaw
Kaangayan tinubdan sa kalinaw
Kaangayan tinubdan sa kalinaw
Kaangayan tinubdan sa kalinaw

Neil Cervantes is from Tagum City. He is a writer and a musician and promoting drum culture. He won 2nd place in Tunog Mindanao 2013

Miaging Semana

Poetry by | June 28, 2021

Mahinumduman nako nga kanunay kang nagabagulbol
Nga atong katre daw sige na lang og kuyos sa kaguot
Kada gabii nga moplastar ka sa akong kiliran

Unya matod pa nimo akong mga hagok sama na
Sa tingog sa dakong barko nga padulong modunggo sa Sasa Port
Ug kasagaran maabtan na lang ka og kaadlawon
Bag-o makapiyong

Nga akong mga ilok kanunay nanimahong inun-unan
Bisan unsa pa nako kadugay og hugas ug lugod
Bag-o ko motupad nimo

Unya matag gabii na lang nato lalisan akong mga saag nga bungot
Nga maskin kada adlaw nako ginabarbas pirmi gayod motapot
Sa imong abaga ug mogitik nimo ngadto sa pagkaigmat

Ug matod pa nimo nga ang mga tiil-tiil sa atong katre
Wala damha kalit nagakurog unya bation ka og panglipong
Ug daw kasukaon basta magsugod na sila og kiling sa walay tunong

Apan mahinumduman sab nako ang mga panahon
Miaging bulan kadtong wala pa ka nagmabdos
Nga atong katre usa ka bangka nga naglutaw sa dagat
Ug ginalabyog-labyog sa mga balod ngadto diri

 

Paolo Andreo M. Sandalo is very much into music, food, pop culture, cooking and his wife, Taps. He just became a fan of Twice but is not planning to be alcohol-free anytime soon.

Hinaot Tanan

Poetry by | June 14, 2021

Hinaot unta

naay igong kahusay

ang tanan

 

Pareho sa tulo sa ulan

nga wa damha ang pagkatagak

niini sa yuta

 

Wala kini kalibutan

ug mawala kay mukuyog

siya sa panun sa tubig nga puhon

mupadong sa baybay

 

Sama pud sa kanunayong

Paghunghung sa hangin

sa imong nawong

 

Nga wa pud ka kamatikod

sa matag panamilit niini

 

Kay sa matag hapak niya

sa imong dunggan

ibilin niya ang saad

nga mubalik siya

 

Mao ra pud ni ang iyang

Kanunayng bugtong pasalig

 

Hinumdumi ang matag hikap

sa adlaw kay wala pud ni niya tuyua

gapasabot ra nga amdam siya

muatiman kanimo

Kay gihimaya siya sa tanang

iyang nagunitan

 

Ang kahusay sa ilang lihok ug gama,

Way laing babag sa pagbuhat sa ilang gusto

Kay kani maoy bagad na sa kung unsa sila

Ug kini ang ilang kagawasan

 

Kagawasang lampingas sa mga tinguha

Kagawasang walay gipiling kondisyon

Kagawasang maoy sumbanan sa tanang

matang sa kagawasan

 

John Ferdinand Torralba is Web developer from Davao City.

Alang Kang Matet Nga Tagakaulo

Poetry by | June 14, 2021

(ang “kolu”mao ang “watershed” sa sinultian sa mga Tagakaulo)

ikaw Matet ang kolu.

ang imong panlantaw
sa inyong pagkatawo
sama sa katin-aw
ning tubig sa suba

labaw nga mulutaw
ang kaanyag
sa pinalanggang kultura
ug kaanindot
sa kaagi sa mga Tagakaulo

ang imong pagbarog
maoy punuan
dili daling matay-og;
mga ugat nga
hugot ang pangupot
sa yutang natawhan.

imong espiritu
daw ning huyuhuy
nanghapuhap

dala mo
ang gininhawa
sa mga katigulangan
duyog maoy kalinaw.

ikaw, Matet
ang kolu.

tinubdan
sa kinabuhi.

Krishna Mie is a social science teacher and a visual arts hobbyist. She also writes from time to time to find solace and solitude.

Akong-kasing-kasing

Poetry by | June 14, 2021

Ang akong kasing-kasing murag balay
ang pultahan dunay anay, sa bintana
ang hinalay, naglaray.
Sa sulod, ang kusina napuno og siomai,
ug ang mga kwarto, sumpay-sumpay.
Isa kay Nanay, isa kay Tatay, isa
kada igsuon nga nag-iyahay sa ilang mga ampay.
Ubay-ubay pud ang gatambay.
Duna akong miga nga way panudlay,
among silingan nga ang kilay permi di magpantay,
si Melay, si Kakai, akong pag-umangkon si Kikay, si ante Tetay
nga way undang ang pagpamaypay,
si Angkol Bokol nga conscious sa hinapay,
si Blanca nga si’g panghipos, panglabay,
si Manny nga di mukaon og gulay,
si Tisay nga ‘pag masuko tubuan og sungay,
si Ser Bem nga si’g baklay,
si Madam Tess nga nay sakit sa atay,
ug ang among iro nga perte kalipay,
bisan pa’g ang kawatan tu-a na, nag-babay.
Hay, asa pa mahapsay ang akong kasing-kasing?
Maglagot ko, magsindi ko’g lukay!
Pero wa ko’y pagmahay, ilabi na
Kung tanang namuyo sa balay
kalit magkantahay,
bisan dili sabay-sabay.

 

Mie Luna writes poems and stories for children. She lives in Davao City.

Tungang Gabii sa San Pedro

Poetry by | June 7, 2021

Sa di pa mutikang kining mga tiil sa orasan,
tagbawon sa kilom-kilom ang dakbayan
sa akong nabatian, makabungol kining kampana
sa matag bagting niining hinagubtob sa dughan.

Kon ngano wa pa ko makauli, di ko kaingon.
Basin imong kalimutaw ang mga posteng
akong malabyan: gasidlak-sidlak, ginasubay
ang dalang hagbay rang gibusdik
sa akong mga kasaypanan.

Kon ngano sige ko’g kasaag, di ko kaingon.
Basin imong tutunlan ang dalan kon asa
ang mga buot kong ibutyag alang kanimo
nagkaguliyang ra sama sa mga sakyanan.

Apan, inig hunong nako sa kanto,
magpabilin ang kahait sa kadulom
nga hagbay rang gibaid
sa atong kagahapon.

Nanirado na diay tanang tindahan.
Ug gikandado na sab sa kahilom
ang akong mga gibati alang kanimo.

Nakauli nako.

 

Ivan Ridge A. Arbizo hails from Davao City.

Miaging Gabii

Poetry by | June 7, 2021

Samtang matulog na ta
Gisaka nimo imong mga kamot ug nangutana ka nako
Kon itom na ba imong mga ilok
Sama sa lubot sa kaldero nga atong ginalung-agan
Nagpahiyom ra ko ug milingo

Kay wala man ka matagbaw sa akong balos
Gibira nimo imong biste paibabaw ug gipakita nako ang itom nga linya
Nga nagdagan sa imong tiyan ug gigiya akong mga tudlo taas niini
Nga daw nagsusi og mga detalye sa mapa
Nangutana ka kon butod na ba ka kaayo sama atong
Nakita nato nga kamprag sa kilid sa dalan katong takdol ang bulan

Unya giliso nimo imong ulo pakilid ug nangutana kon
Mobalik pa ba imong liog sa karaang pagkahamis ug pagkapution niini
Naningkamot ko og pugong sa akong panghuy-ab unya nakita nako nga
Mibaliskog imong mga kilay timailhan nga nairitar na ka
Pero kalit lang nawala imong kasapot ug miingon ka nako
Nga nakabati ka og gaan nga sikad

Paolo Andreo M. Sandalo is a big fan of music, cartoons, pop culture and his wife, Taps. He spends his weekends doing the laundry and looking up recipes online.