Gaakal ang amoang class schedule sa tibuok semester. Diri man gud diay sa Thailand, isagol nila ang regular ug students with special needs. Ibutang ta, naay tulo o lima ka estudyante nga special. Pun-an pa sa 35 ka regular unya magdungan ni silag salida — mora gyod kag mayawaan. Naay magdagan-dagan libot sa klasehanan. Naa puy mokalit lang og tibi unya motiyabaw sa way daghang rason. Lahi pod ng magsirko-sirko sa imohang atubangan. Dayon duna puy lain nga magsigeg tahal sa iyang lapis hangtod kini mapudpod. Unya kani nga istilo nila ilabi na og matunong ka og First Period sa hapon, magsunod ni sila og pananghid nga moadto sa pansayan. Inosente pud tawon tang nitugot sa ilahang gipangayo. Dakong kahibulong nako nga taud-taod naman wala pa man nahibalik. Ug sa dihang akong giapas, nakit-an nako didto nga gadula ug gasinabligay og tubig. Nakaingon gyod kos akong kaugalingon og unsa ni silang klaseha sa mga mananap. Mayawaan gyod diay tuod ka. Bantog ra niana akong mga kauban nga mag-andam gyud sa gira kay lahi ni silag timplada. Tinuod gyod diay tong ilahang giingon nga Lunes pa lang, maluya ug mapagaw naka. Bantog ra pud diay nga dunay koy usa ka kaubang Pinoy nga gabalon permi og luy-a ug unsa pa tong klaseha sa habak ug panawal sa kalawasan. Panagang diay to niya aron dugay siyang malup-og.
Kabahin ni T. Wannee, nakabantay ko nga bugnaw ang iyang tinagdan nako sa unang semana sa akong pagtudlo. Paminaw nako, naniid kini sa akong batasan ug gawi ilabi na sa paagi sa akong pagtudlo. “Nakamenos man tingali ni nako si T. Wannee tungod kay dili ko Native English Speaker o NES. Bahala uroy siya sa iyang uray. Basta ako, magpadayon ko sa akong misyon diri” pag-alam-alam nako sa akong kaugalingon. Dili nako ikaulaw sa pag-angkon nga dunay mga higayon nga mokalit lang og tulo akong mga luha. Tingali agi sa akong kahiubos sa akong pares. O kaha, agi pod sa kamingaw sa akong mga minahal sa kinabuhi nga nahibilin sa Cebu. Kamingaw, ilabi na gyod sa akong pinangga nga inahan nga maoy nagtuboy ug wala gyod gaduhaduha pagpugong kanako nga mangempleyo sa laing nasud.
“Master Glenn, you do traffic duty now!” pinabundak nga sugo ni T. Wannee sa akua samtang gapuliki kog check sa test papers. Apil man sa amoang tahas kada alas kwatro sa hapon ang pagbantay sa trapiko sa sulod-gawas nga mga pribadong sakyanan nga gimaneho sa ginikanan o bantay sa mga bantay. Mao pod ni ang oras nga tingpanguli nila. Ang klase sa prathom mahuman inig alas tres sa hapon. Dayon naa silay usa ka oras nga igahin para sa nagkadaiyang club. Wala ko kamatikod nga oras naman diay aron moabag ko sa mga Tayutay nga mangulohan pagka traffic enforcer. Oras pud ni sa laing papel namo aron mag-yaya ug yoyo. Tuod man, akong nasaksihan ang mga bata nga morag nagkadaiyang klase sa mananap nga nakabuhi sa kuwadra.
Naandan na nako ang maong bulohaton. Mausab lang kini kon adunay laing importanteng isugo nako si T. Wannee. Sama pananglitan kon naay umaabot nga English InterSchool Competition diin akoy patudluon niya og Extemporaneous Speech, Oration, o Spelling Bee sa amoang mga representante.
Katapusang semana sa Septiyembre, nagpahigayon og field trip ang Prathom 6. Adunay gigahin nga tagsa-tagsa ka mga bus ang matag seksyon diin ang class advisers maoy mangunay sa pag-uban ug monitor sa ilahang hinsakopan. Human namo napahimutang ang tanang mga bata ug wala nay mga kakulangon, padulong nako lingkod sa akuang pwesto duol sa drayber.
“Master Glenn, you sit beside me” maabi-abihong pagtawag ni T. Wannee nako. Tuod man, isip pagtahod kaniya ug sa mainitong imbitasyon, gidawat ko kini. Ang amoa diayng lamisa sa lawak-tunghaanan ni T. Wannee tapad ug buyon ra. Gamay ra ang gintang sa kalay-on niini. Apan bisan pa man sa maong sitwasyon sulod sa upat ka bulan, aduna gihapon koy kahingawa. Lahi ning kahimtanga karon. Magtapad mig lingkod sulod sa pipila ka mga oras. Usa pa, walay daghang babil tali namong duha.
“Tabang tanang mga Angheles ug Santos sa kalangitan! Tabang tanang mga kalag sa purgatoryo!!!” pangaliya nakog taman nga ako ra puy makadungog sa dihang nilingkod nako tapad ni T. Wannee.
Didto inanay nga gipaambit niya ang mabulokon nga tipik sa iyang kinabuhi. Nagdako siyang ilo ug maoy namat-an sa iyang buot ang pagpadako kaniya sa mga madre. Niya pa, pinikito ug inihap ang iyang lihok didto sa kumbento. Isip pagtan-aw nga dakong utang kabubut-on sa pagpadako, pagbuhi, ug pag-alima kaniya — giduphan niya ang maong bokasyon. Apan makadiyot ra ang iyang pagdawat sa papel isip kapikas ni Hesus tungod sa iyang sakit. Wala na niya gisugid kon unsa ning klaseha. Wala pod ko nangutana kay igo ra kong naminaw sa iyang pagpaambit. Tungod sa giaguman niyang sakit, nibiya siya sa iyang pagkamadre. Ug nakahukom nga magtudlo. Mathematics gyud iyang major pag college ug dili English. Dugang pa niya, nakita sa tag-iya ang talagsaon niyang hiyas sa pagtudlo ingon man usab ang kahaniti niya sa pag-Iningles. Gawas pa nga pinaagi sa maayo niyang pagpangulo sa SMGSP, kanunay kini nga makadawat sa nagkadaiyang klase sa pasidungog. Usa na niini ang kanunay nga pag-una sa listahan sa tinuig nga Ordinary National Educational Test kon O-NET nga pagasalmutan sa tanang tinun-an sa Prathom 6, Mathayom 3 ug 6. Mora pud ni og National Achievement Test o NAT sa atua. Dili momenos sa 95% ang overall performance rating sa maong tunghaan. Ang way samang dedikasyon ug ang paglaban sa dungog sa SMGSP mao gyuy pinakadakong rason og nganong dili gyod buhian sa tag-iya si T. Wannee. Baynte ka tuig na diay siyang gatudlo sukad sa among panagkauban.
Samtang padayong gadagan ang gisakyan namong bus, padayon pod sa pag-asoy ang akong pares. Gisultian ko niya sa mga kanhi nakauban na niya nga Pinoy ug ang dili niya malimtan nga mga kasinatian uban nila. Ubay-ubay napod diay nga mga nasud ang iyang naadtuan. Daghan napod siyang nahimamat nga nagkadaiyang klase sa rasa. Apan usa sa mga wala nako damha nga gipaambit niya mao ang pagpakita sa hulagway sa iyang kanhi kapuyo nga farang. Usa kini ka retired US Army. Gipakita dayon niya sa akua ang pipila ka mga litrato nilang duha nga naa sa iyang selpon. Gikan ang maong hulagway sa una nilang panagkita sa Pattaya. Sweet kaayo silang duha. Kon hukman mo ang maong talan-awon, makaingon ka nga gikan ga-honeymoon.
Gitutokan ko ni T. Wannee. Dayag ang kaseryoso sa iyang nawong. Morag gisukod niya akong katakos. Nisugod og lagubo ang akong dughan kay basig mitukar napud iyang uray. Nikalit dayon kini og pahiyom. Laing klase sa Thai smile nga kato pa nako nabatyagan. Ang maong pahiyom daw sama katam-is sa dugos sa putyokan. Ug unya, iyang gipaak ang ubos ug pula niyang ngabil. Nagpitok-pitok iyang mga mata morag tamsi nga bag-ong natughan.
“Good guys go to heaven. Bad guys go to Pattaya. Are you bad, Master Glenn?”
Si Gerwin Vic Evarretta Bhuyo usa ka magtutudlo nga OFW sa Bangkok, Thailand. Kinaham niya ang pagkuha og mga hulagway, pagsulat og balak ug sugilanon. Kon walay kakulian, magyampungad ni siya sa mga ipahigayong book sale event.