Ako at ang Syudad

Poetry by | December 7, 2008

Puta ang turing ko sa syudad
sa mga sandaling kinukumutan
ng kulay abo ang kalangitan.

Nagmemeyk-ap ng maputlang ilaw
upang ikubli ang mga bitak at dungis
ng bawat edipisyo, iskinita’t kanto.

Nagsusuot ng mga karatulang
bumabakat sa mga panindang
nangangako ng kaluwalhatian.

Nag-iisprey ng nakahihikang pabango
na nagmumula kundi man sa sigarilyo
ay sa humaharurot na mga tambutso.

Naglalasing sa mga himutok at hinaing
ng masangsang na simoy ng hangin
at baradong kanal na walang pumapansin.

Nang-aalok ang kindat ng mga neon lights
ng mura at matataas na diskuwento
sa de-kalidad na masahe at karinyo.

At ako, ang isa sa mga parokyanong
naliliyong nakikipagkalakalan
sa nanlilimahid na lipunan.

—-
Si Edgar Bacong ay tubong Dabaw at nakapagtapos ng Bachelor of Arts in Sociology sa Ateneo de Davao University. Dahil sa pag-ibig ay nilisan niya ang bayang kinalakhan at ngayo’y naninirahan sa Zurich, Switzerland. Marami na siyang tulang Tagalog at Cebunao na nailathala sa iba’t-ibang babasahin.

Leave a Reply

Your email address will not be published.

This site uses Akismet to reduce spam. Learn how your comment data is processed.