(Upod sa Drayber sa Balak ni Adonis Durado)
Dong, pamati-i bala
ang akon mga i-hutik nga binalaybay
kay sa imo nga habal-habal ako masakay.
Pasensiyahi lang ang mga dagubdob sang akon dughan
kay daw kalulbaan sang aton gina-agyan nga mga dalan.
Kung kita gani mabulasot, sige lang, pasugot
nga magkupo ako sa imo sang hugot-hugot
pareho sang lastiko sa akon buhok nga nakahigot.
Dong, indi gid pagbuy-i ang manobela
biskan makalam ang akon malabaab nga mga ginhawa
biskan ginadilapan sang hilamon ang imo mga paa
ang aton dalagan, dong, padasiga
padasiga,dong, padasiga
asta magpiyong ang aton nga mga mata
asta aton masugat-an ang mga bulak, dahon,
talithi kag ulan didto sa kalangitan.
—
Karla Quimsing is a Cebu-based writer who was in TABOAN 2011.