Tag: Jhunorjim Caumbo Zandueta

Hinabi ang mga kulay, at dinampi sa may lona
Upang tingkad ay mabuhay at magkadiwa ang obra.
Ginuhit ang mga hugis, mga detalye at linya
Upang mapukaw ang tamis ng gunita’t ala-ala.

Bawat katha ay hinubog ng matalim na haraya.
Bawat obra ay bantayog ng tagumpay at ligaya.
Nililok ng pagsisikap, pinagtibay ng pag-asa
Ang pagtupad ng pangarap, at paghulma ng korona.

Ngunit makipot ang daang tinatahak ng malikhain
Bago anihin ang bungang itinanim sa dalangin,
Bago sumibol ang tinta at magliyab ang damdamin,
Bago matapos ang obra at mabuksan mga tabing.

Bawat pinta ay sagisag ng inipong karunungan.
Bawat kulay ay liwanag ng nabuong kamalayan.
Bawat dampi, bawat hampas, nahubog ang katauhan,
At ang pinakamimithi ngayo’y pinanghahawakan.

—
Jhunorjim Zandueta is a computer engineering student.

Ako’y nabuhay ng gising
Gising sa bawa’t kataga
Gising sa bawa’t salita
Gising saking bawa’t gawa.
Ako’y nabuhay ng mulat
Mulat aking mga mata
Mulat itong kaluluwa
Sa tinatahak ng paa.

Kitang kita ko ang tinta,
Ang bawa’t guhit at pinta
Ang bawa’t hugis at hubog
Ang bawa’t ilaw at linya.
Natatanaw ko ang daang,
Patungo sa katapusan
Patungo sa kabayaran
Nitong aking bawa’t hakbang.

Ako’y nabuhay ng gising,
Mulat sa bawa’t alamat
Alam ko’ng ang bawa’t sulat
Ay may sukli na katapat.
Ngunit bakit ba ganito?
Alam ko na mali ito,
Kasalanan itong sakdal
Kumakawag pa rin ako

Bakit di ko malabanan,
Bakit di ko mapataob
Halimaw na nilalamo’t
Nagpapahina ng loob?
Hindi na nga yata sapat,
Malaman tama sa mali
Dapat matutong magbuhat
Ng maleta’t magmadali.

Dahil baka mapag-iwanan,
Ka na nga ng panahon.
Mga prinsipyo mo noon
Baka di na angkop ngayon.
Hindi na nga yata sapat,
Maging gising maging mulat.
Dapat malaman mo kung paano
Ihahagis ang lambat.

Jhunorjim Caumbo Zandueta is a Computer Engineering student from ADDU.

Sawang-sawa na ko sa t’wing ako ay tinatangay,
Ng kamalasan at para na ba akong bibigay,
Minsan nga’y iniisip ko sa kabaong na mahimlay,
At hintayin na lang ang oras na akoy mamatay.

—-
Jhunrojim Caumbo Zandueta is a sophomore Computer Engineering student at ADDU.

Ilang ulit ng nadapa,
Ilang ulit ng tumayo,
Ilang ulit ng nasaktan,
Ilang ulit ng nabigo,
Ilang ulit ng umiyak,
Ilang ulit ng nawalan,
Ilang ulit pa bang ulit,
Ang aking dapat lampasan?

—-
Jhunrojim Caumbo Zandueta is a sophomore Computer Engineering student at ADDU.

Gano kalayo ang milya,
Na kailangan kong tahakin,
Upang ikaw ay makita,
Upang muling kausapin,
Upang muling masilayan,
Mata na umakit sa akin
Upang muli kong masabi,
Alab ng aking damdamin.
Gano kahaba ang araw,
Na kailangang padaanin,
Na kailangang palipasin,
Upang ika’y makapiling?
Laman ng aking dalangin,
Palagi mong iisipin,
Di mo man ako piliin,
Ikaw lang ang iibigin.

—-
Jhunorjim Caumbo Zandueta is a Computer Engineering Student at ADDU.