I.
Dumduma ang pagwagtang sa mga sala.
Dumduma ang mga salbahe
nga nagpahilak sa’to tungod sa ilang
mga pait ug baliko nga pangsangyaw.
Dumduma ang mga lider sa’tong tinoohan
nga miluhod sa mga sapatos sa politiko.
Dumduma pud ang mga armas nga mikanta
sa ngalan sa Ama, sa Anak, ug sa Espiritu Santo
kon naay manambit og Ya Allah
Ug tanan santo ug propeta karon mosyagit
ug AMEN niining tanan.
II.
Unsaon nato mahimong instrumento
sa manunubos kon kita’y nagpuyo
sa sulod sa bulawan nga baka?
Unsaon nato paghigugma ug pag ampo
nga na’wa na ang mga rason sa’tong byahe
padung sa arka sa kasabutan?
Nakatog na ta sa kanindot sa mga kanta
nga gibuga sa’tong mga dalunggan… (pagmata)
III.
O dakbayan sa mga sayop
o dakbayan sa mga nindot nga kanta
ig-ampo mo kami.
Atong iselebrar ang mga bulok nga prutas:
o siya nga muhigugma sa aton
o siya nga mu-aprobar sa aton—
wala ta kabalo.
Dumduma dumduma ang pagwagtang sa mga sala
IV.
Atong ikompara ang mga kaugalinong mitolohiya:
Ingna ang imong mga igsoon
ipakita sa imong mga igsoon
ang mga sala nga nahimong bulak
sa imong pagsibat
Jeff Raiven C. Iway writes from Cateel, Davao Oriental.