Sa kangitngit nako una nailhan ang himaya sa lawas.
Wala sulod sa simbahan, apan sa sulod
sa imong gamayng kwarto kon asa gikompisal
nato ang gipangitang kaluwasan.
Mingluhod ko una,
sama sa debotong andam na mangalawat.
Mingpiyong ko
ug gidawat ka sa akong baba.
Kita ang simbahan karong gabhiona
ug ikaw ang akong simbahon.
Saksi ang mga bungbong sa atong pagdayeg.
Saksi ang kama sa pagsalmo natong duha.
Ang mga kamot hu-ot ang pagkupot
sa usag-usa nga murag walay ugma.
Ang mga baba nato gasampit
og paghimaya.
Ug ang pagpangalawat sa atong mga halok
sama sa paghalok sa dagat sa balas—
walay pu-as, walay kataposan.
Mingtindog ko ug mingluhod ka,
ako ang pari ug ikaw na pod ang mingsimba.
Sa kaluwasan nga gipangita sa atong lawas
kita nahimong usa.
John Gilford A. Doquila is a graduate of the BA English (Creative Writing) program of UP Mindanao. Presently, he teaches creative writing and literature subjects to high school students in a Montessori school in Quezon City.