I.
mingaw ang kadalanan
sulbad ang problema sa trapik sulod sa usa ka bulan
nakapahulay ang mga panganod
og tigom sa carbon dioxide-sa iyang paghilak, sa iyang pagbakho
nabanhaw ang mga patayng bituon
nabanhaw human ang liboang tuyok sa bulan
oh, dihay mga bag-ong bituon sa langit!
maayo na lang, tin-aw ang kalangitan.
unyang gabii, paaboton ko ang pagsubang sa di maihap nga kabituonan.
II.
mingaw ang kadalanan
limpyo ang mga eskina sa siyudad
walay mga plastik ug selopin
nga gikalibang sa dagkong mga factory
gipanaog sa kahitas-an
ang alimpulos aron limpiyohan ang kalibotan
ang mga kahoy, kalunhaw sa ilang dahon
ang mga buwak, buyog, ug tamsi nanayaw og kuradang
mipasundayag sila sa Kinaiyahan-
ang pinakadakong entablado sa tibuok kalibotan
paminawon ta ang ilang awit
pakpakan ta sila, ila karong taknaa.
III.
ang mga rugby boys, nag-facemask
ang mga snatchers sutoy pas kwetis
nangkagiw pauli sa ilang bay
ang mga runners sa droga
gatuk-ong samtang nagpaabot sa ayuda
wa na magsalib-ay og labakara sa ilang abaga –
gasampong silag good morning towel sa ilang nawng.
IV.
ang mga maas, gahi, siga, nangutkot sa ilang ulo
ug nanaguto misunod sa mando sa home quarantine
ang mga nanglayas gikan sa ilang bay
mipauli na- nahiusa ang pamilya
ang batang yagit, nanghinaw nas iyang kamot-
kada-adlaw ang iyang bertdi-
apan nagkusmod ang iyang dagway.
hamis baya diay ang pikas aping sa Corona
sinaw, way lama- modakins-aw ang langaw
maayo na lang, tin-aw ang kalangitan
unyang gabii, paaboton ko ang pagsubang sa di maihap nga kabituonan.
Jovanie was a fellow for Balak in the 59th Silliman University National Writers Workshop (SUNWW) 2021 and 21st Iyas National Writers’ Workshop 2022 for his Sugilanon.