Masahe sa City Plaza

Fiction by | January 1, 2017

“Maygale naabtan pa ko nimo diri, Mam,” matod sa akong suki nga masahista. Iyahang bus-ok nga mga bukton mihulma sa iyang nipis nga puting sando. Milingkod ko sa gamayng plastik na lingkoranan ug gibutang ko sa kilid ang akong napalit nga karne ug utan, apil ang akong naukay nga mga blaws. “Ulahi najud tika na kustomer mam. Sayo man gud mi ugma sa Marawi.” Gipatong nako ang akong mga tiil sa iyang paa.

“Mag unsa mo didto dong?”

“Didto mi mobotar mam,” matod niya dungan sa pagbubo sa uwil sa iyang mga kamot.

“Ha? Didto diay ka narehistro?” Iyahang gisugdag masahe ang akong mga bagtak nga mihawoy sa pagtindog og dugay sa ukayan.

“O, pero sila ra ang garehistro sa amo mam. Igo ra ming nagpirma sa form na ilang gihatag, tapos sila ray nagpadala dadto sa Marawi.”
Nahimatikdan ko ang iyang nawong nga nabaknot, ang singot gatulo naingog duga sa iyang mala-Adonis nga nawong.

Hapit na mag alas onse sa gabii apan ang plaza puno gihapon ug mga tao. Ang uban nagkaon og liston, proben ug uban pang sugba-sugba. May nangukay sad sa kilid-kilid samtang ang banda puno sa kinabuhi nga nagtukar sa tablado.

“Dili na delikado dong?”

Iyahang gi hilot-hilot akong paa ug mitubag, “Dili man sad mam kay hatod-sundo man mi ugma sa kadlawon, para dili daw mi harangan sa kontra sa among botohan.”

“Unsa puy inyong sakyan?”

“Service sa Mayor, hakuton mig mga van ug Fortuner. Daghan-daghan man sad ming managsilingan sa Suarez mam. Naa gale taga Cagayan ug Bukidnon.” Iyahang gimasahe ug ayo akong likod, sugod sa ubos hangtod sa taas pahinay-hinay apan may kusog.

“Pila man diay bayad sa inyo?”

“Lima ka libo per head mam.” Ang ako na sang mga bukton ang iyang gi masahe.

“Yahay ba kayo kon diri na ah. Kinsa lugar imo presidente?” Ang akong mga kamot ang sunod niyang gihilot, dili kaayo kusog ang paghimas. Nagbalikos among mga kamot sama sa mga tanom na gakatay-katay sa daplin.

“Jojo mam.”

“Hala, kawatan man daw na siya dong.” Gamit sa iyang mga tudlo, iyahang gipisil og maayo ang akong agtang ug ulo.

“Packaged deal naman gud na ang lima ka libo mam. Naa nay lista sa among botaran ba. Sundon lang to namo ang gihatag nila.”

Tanang luya nga parte sa akong kalawasan nawala pagkahuman sa masahe. Iyang gitrapohan ang singot sa iyang nawong gamit ang labakara. Mitindog ko ug gitunol nako ang usa ka gatos na bayad.

“Sunod biyernes nasad mam ha,” nipahiyom sya kanako.

Pagkasunod adlaw, samtang nag ukay-ukay ko, nanlimbawot akong balahibo sa akong nadunggan.

“Hala, hurot akong mga silingan ani,” matod sa babaye sa akong tapad. Nahibaw-an nako na ganinang kadlawon, duha ka van padulong sa Marawi ang giharangan sa mga armadong lalaki ug gi-ambush. Nahulog ang akong gigunitang silopin na gisudlan sa akong mga naukay.
Mihawoy ang akong tibuok kalawasan, nawad-an og kusog akong mga tiil ug namugnaw ang akong lawas.

“Naunsa ka?” nangutana akong bana.

Mihugot ang akong kasingkasing ug wala nako matubag ang iyang pangutana.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.