ihapa
ang bun-og nga nadawat mo
sa matag gabiing
muuli siya nga hubog
sukda
ang kalawom sa samad
sa panit mong
gihimo niyang tadtaran
banabanaa
ang mga adlaw
nga ikaw nahadlok
kay iyang kumo gahulat kanimo
sa imong pag-ihap
sa imong pagsukod
sa imong pagbanabana
ayaw kalimti
nga wala na’y laing nagpangga kaniya
nga kung mutunob ka paggawas
sa balay kun diin ka
gibun-og
gisamaran
gisumbag
wala na siya’y balikan pa
magdahom ka
nga ang imong gugma
ug sakripisyo–
dili gayod ma-ihap,
dili gayud masukod,
dili gayud mabanabana–
ang makabag-o kaniya
aron tawagon kang asawa.
—
Mr. Obinque is a second year BSED-MATH student of Ateneo de Davao University.