Gusto ko mobalik pagkabata

Poetry by | September 11, 2011

Gusto ko mobalik pagkabata
Kanang dula ray hunahunaon
Saputon kon sayos buntag
paligoon, molaag sa pikas balay
Muoli’g makadungog sa sitsit
ni nanay ug tatay kon oras na tingkaon.

Gusto ko mobalik pagkabata
Kanang walay dautang tinguha
Kanang limpyo ang hunahuna,
mahadlok lang kon mapawngag suga sa kasilyas,
mohilak kon di paubanon ni nanay sa palengke
kay mahugaw ra daw ko didto,
Ug adunay mangidnap ug bata.

Gusto ko mobalik pagkabata
Kanang dasig kayo kon makakita’g libro
Basahon konohay ug kusog,
morag korek nga nagtuon
Eksayted sa quiz papers kon ibalik ni ma’am
Kay matod ni tatay, kon maka-100 ko
Iyahang paliton bisan unsay akong gusto.

Gusto ko mobalik pagkabata
Kay karon,
Wala nay manitsit tingkaon
Wala nay mamokaw aron ko paligoon
Daghan nay malisya
Daghan nay kahadlokan
Daghan nay butang angay hilakan,
Ultimo kadasig pag-ablis libro
Nawagtang,
uban sa akong pagdako
uban sa mga panahon
nga kaniadto
kami kompleto,
Si Nanay
Si Tatay
Ug ako.


Reymond is a 4th year AB Mass Communication student of Ateneo de Davao University and a fellow of Davao Writers Workshop 2010.

Leave a Reply

Your email address will not be published.

This site uses Akismet to reduce spam. Learn how your comment data is processed.