Ingon nila
Dili lisod ang kahimtang sa kabit
Sa pagkatinuod
Swerte ang kabit
Morag nidaog og lotto
Walay papeles na makagapos kaniya
Walay hawla na iyang puy-an
Walay commitment na iyang ampingan
Walay mga ugma na pangandaman
Walay bata na bantayan ug patutoyon
Basta kabit walay kagahapon ug ugma
Ang tanan naa ra sa karon
Ingon nila
Easy job ra pod ang trabahong kabit
Lami ang kaon, nindot ang regalo
Satisfaction guaranteed ka gayod
Ang lami pa ani, can return and exchange pa
Pagdili na siya sa imoha
Ayaw kasakit
Kabit ra ka, uy
Duna man poy imo ani
Dili ba
No return no exchange man pod ang mga gasa niya
So ang mawala sa imo siya lang
Apan kadali sa replacement pod, uy
Mag-chat ra ka, mag text text
Ug bag-ong lover applicants dayon
Unya interview pinaagi sa eyeball didto sa mall
Unya okay pa sa all right ang mosunod
Kay makapamili na pod ka og maayong male lover
Na magmahal kanimo hangtod sa kahangtoran.
Ang kinahanglan lang sa relasyong kabit mao kini:
Permanenteng humot
Up-to-date ang ka-sexy
Maayong maminaw sa mulo sa lover boy
Kahibalo sa kahimtang sa nasod ug sa gawas sa nasod
Sige og katawa ug expert mopakatawa
Dili kahibalong masuko
Limpyo ang balay
Pasensyosa
Malambing
Always ready sa iyang pag-abot
Basta ayaw lang pagbati og gugma
Kinahanglan lang na ganahan ka sa sitwasyon.
Mosulod ka sa relasyon na abli imong mga mata
aron wala kay basolon sa imong kasakit
o mapasanginlan sa imong tumang kaguol
Basta magpalayo ka sa bitad sa gugma
Kana bang ikaw lang ug siya sa imong kalibotan
Siya ang tanan tanan sa imong pagka-ikaw
Siya ang adlaw
Siya ang gabi-i
Siya ang Bulan
Siya ang bituon
Siya ang kangitngit
Siya ang kahayag
Siya ang sinugdanan
Siya ang kataposan
Usa pa diay na angay nimong hinumdoman
Dili man lisod ang tawagon ka og kabit
Ay, unsa man lang na? Mga ngalan na libre
Pareha ra na sa ngalang
Kabit, minyo, bulag, byuda, dalaga, dala na,
married-annulled, dagang gulang,
Mga label lang na aron madugangan ang katas-on sa imong ngalan
Unsa man lang na?
Mga sampit na walay kalakip na gantimpala
Hunahunaa kini ug ibutang sa imong alimpatakan
Ang ngalang kabit nagdala og pahimaya na dili malabwan
Apan magpalayo ka sa tentasyon na aduna pay lain
nga ngalan para kanimo
Kalimti na sa imong kasingkasing siya lang ug walay lain pa
Siya ang litson sa imong bahaw
Siya ang asin sa imong sabaw
Siya ang coffee mate sa imong kape
Siya and tubig sa imong ice
Siya ang sago sa imong gulaman
Siya ang latik sa imong suman
Dili intawon sakit ang tawagon kang kabit, uy
Walay luhang motulo sa iyang paghawa matag kaadlawon
Ang paglakaw niya inig human na ang romansa
Dili nimo na hunahunaon
Ngano pa man daw pabug-aton ang paglakaw
Mobalik ra man na ug mingawon sa imong kahumot
Nabahaw ang panihapon kay nakalimtan niyang mobisita?
Oki lang
Makalimtan ra na nimo sa iyang mga halok sa bugnaw nimong liog
Ang pagtawag sa imong selpon kon makahinumdon siya
Oki ra uy
Duna kay unlimited load ipadala niya unya
Ang dad-on ka og adbentyur na pagpanuroy didto sa halayong baryo
Exciting ni kay duha ka bukag na durian ug mangosteen
imong bitbiton pag-uli
Ang mangaon sa bukot-bukot na karendirya
Aron walay makaila, walay makakita
Washout dayon na
Sa gasa niyang goldilocks ug red ribbon matag Lunes
Basta ayaw lang gyod kalimti
Na dili ug dili gayod nimo handumon na
Siya ang imong ikaw
Siya ang imong katawa
Siya ang imong panghupaw
Siya ang imong damgo
Siya ang imong ginhawa
Siya ang imong gamayng ginuo
Nganong masubo man ka?
Kabit ka ra, dili ka asawa
Ang kabit walay katungod moangkon
Sa pangalan dili ka gayod makatag-iya
Sa lawas tuhik-tuhik ray imo
Sa mga damgo mumho lang ang imo
Sa ugma wala ka nahisulat
Kay kabit ka ra, kabit mao ra ka
Walay kalibotan kon dili ang mga kama
Walay hisgotan kon dili ang mga karon
Walay handumon
Walay paabuton
Walay sugilanon
Kay ikaw, kabit,
Mao ra ka.
Unya mao ra na
Trapohi na ang imong mga luha
Kaligo na kay moabot na siya.
(24 March 2010)
—
Si Riza Racho-Baldovino usa ka abogado nga nagatudlog English ug Pamalaod sa Ateneo de Davao University.