Banig

Poetry by | November 2, 2008

Usa ka balak-dula

Gabii na sab. Ilatag ko na pod ang banig, labi na sa bugnawng gabii, ang likod way laing ikasalig. Nangatastas na kining banig. Mikupas ug miyatyat na. Hapnigan nakog baga nga habol aron di sakit higdaan.

Isangit ang higot niining moskitero. Sa paglabay sa panahon dili ko na madali-dalig syumoy kining tali sa lansang (mokatawa). Gakurog akong mga tudlo. Ipiton og unlan kining parte sa moskitero nga nabangag aron dili makasulod ang lamok. Usahay mosindi kog katol, unya payak-on kini sa botelya. Ang aso morag panganod sa ibabaw sa moskitero, apan morag dili na madutlan ang lamok niini.

Sa dihang andam na ako mohigda, ang mabilin nga suga mao lamang ang lamparilya. Ang kayo niini morag gapirok-pirok, gakipat-kipat mora bag mapawng, nahadlok, giyaga-yagaan og gitik sa hangin nga molili ning payag.

Ug sa dihang malansang na akong mata sa kisame, maglisod na akog katug. Inig piyong nako daghan kog makit-an. Kaguol ug kahingawa para ugma. Ako gayong pugson, kay gikapoy ko. Apan sa dihang madungog ko na ang imong tunob, gikan sa hagdanan padulong dinhi sa atong banig, magbukot ko sa akong daang malong, ilukot kog guot sa akong lawas, morag suman, morag ibus. Magpahagok-hagok aron ingnon natug. Usahay magpanganga-nganga ko aron kaluy-an sa akong kakapoy. Kanunay na lang, nanganad man pod ka. Sige ra kag pamirag habol. Pugson tag pahayang. Dili na lang man pod ka mananghid o manghanyo….

Gimingaw gyod ko niadtong panahon nga nagahisgotanay pa ta sa akong mga kaguol, pangandoy, kahingawa, ug kalipay. Kato bang magdagan-dagan ta sa pilapil ug magkinantiyaway kon mahulog sa basakan, ug manungkit tag bayabas, unya isuso sa suka. Malipay dyod ko kaniadto kon mokuha ka na sa imong plawta unya manawag tag hangin ug kahilom, o kon motokar ka sa imong sista, ug imo kong kantahan, unya magduyog tang duha, unya mohigda ko sa imong paa… Gimingaw na dyod ko ato.

Apan karon, paminaw ko nga mora ra pod kog banig nga higdaanan, pahulayan, ug pagawsan og pagbati. Inig human sa lawom nga gabii, lukoton unya ipadaplin, unya ilatag pag-usab kon kapoyon na pod ka.
Kon madungog ko na ang imong dagkong tunob, kulbaan na usab ako, kabalo ko nga unsa ra gyod ang imong tuyo, ang mokiyod…

O banig tabangi ako, gaksa ako aron sa hingpit masusama na lang ako kanimo, hangtod wa nay kusog akong mata nga molurat. Magpasalamat ako nga unta inig tulog nako, dili na ako mahigmata ug magdamgo na lang kanunay sa kalipay uban ning banig sa kinabuhi ug kamatayon, kining banig sa pag-inusara.

One thought on “Banig”

  1. Kanindot ani nga balak-dula.
    Mura ko ug gidala pagbalik sa panahon sa akong pagkabata diin ang among higdaan kay banig nga nipis ug ang among moskitero kay dunay mga buslot. Ang among suga kay lampara ug duna sab mi moskito killer.
    Salamat ani. Patsada kaayo pagkasulat. Kongrats.

Leave a Reply

Your email address will not be published.

This site uses Akismet to reduce spam. Learn how your comment data is processed.