(Alay kay Ate Guy)
Pagkalikha’y ayon sa aming kulay
Sa sukat na aming kapantay
Sa amin di kaiba ang buhay
Ikaw ay kauri’t kaugnay
Sa iyong pagkinang
Nabago ang pagtingala
Dati’y nasa langit
Ngayon nasa lupa
Iyong tinig
Ay aming himig
Ginintuan sa pandinig
Sa iyong mga titig
Kahit walang tinig at pandinig
Kaluluwa’y naaantig
Iyong kahinaan, iyong kalakasan
Iyong pagbaba, iyong pag-akyat
Iyong kasawian, iyong tagumpay
Iyong larawan ay sambayanan
Mahugnay ang kaunlaran
Daang taong inaalipin
Kasawian pighati’y iyong inangkin
Pag-asa’t pangarap nagpapaningning
Sa paglisan ng ginintuang tinig
Hayaang magpahayag likhang sining
Hayaang pagtanggi’y iyong angkinin
Pambansang Alagad ng Sining
Nang masa’y patuloy matanglawan ng ningning
Mr. de Vera is a veteran Davao-based artist. He began his career sculpting wood and stone but later gravitated to painting watercolor, oil on canvas, and even lacquer acrylic.