Tag: Paolo Andreo M. Sandalo

Ang Misteryo sa Sigbin

Fiction by | March 10, 2025

Magduha na ka semana ang milabay sukad mikuyanap ang hungihong nga aduna’y sigbin sa Purok Gumamela.
Nagsugod ang tanan kadtong mitug-an si Nong Piktoy sa iyang mga kainom og tuba. Nakita niya ang mahikanhong mananap duol sa kamotehan usa ka gabii niana nga mipauli siya sa ilang balay. Matod pa niya, nagtuwad-tuwad kini atubangan sa punoan sa saging ug nasug-an gamay sa iyang espat. Kalit kuno kining midagan palayo.

Samtang miangkon ang tiguwang nga hubog siya ug nahibilin iyang antepara atol niining panghitaboa, sigurado kuno siya nga sigbin iyang nakita niadtong gabhiona.

Lahi sab ang gisaysay ni Berta Bungol. Nadunggan kuno niya ang sigbin nga nagbahis-bahis dapit sa ilahang kamotehan mag-alas diyes na sa gabii. Nahitabo kuno kini kadtong gibati siya og sakit sa tiyan og miadto sa kasilyas sa gawas sa ilang panimalay aron maalibyohan ang iyang kahimtang. Wala na niya nakita ang mananap kay asta kunong ngitngita sa palibot.
Continue reading Ang Misteryo sa Sigbin

Ang Atong Ulahing Pakighinabi

Uncategorized by | January 6, 2025

Ang Atong Ulahing Pakighinabi

 

Mahinumduman nako ang ulahing higayon nga kitang duha nagkaistorya

Miingon ka nga limpyo kaayo ang mga bungbong sa among panimalay

Ug misulog-sulog ka nga mapuno na kini og mga buling puhon

Misulti ka nga hapinan og panapton ang mga mahait nga mga kilid sa lamesa ug aparador

Kay paspas managko ang mga bata ug basin mapakong

Mihangyo ka nga dili paraton ang mga sud-an

Ug magluto gyud ko kanunay og law-oy

Pagkahibalo nako sa panghitabo duha ka adlaw bag-o mag-Pasko

Dili na nimo makita unsa na kahugaw ang among mga bungbong

O kon unsa na katangkad ang mga bata

Abanse, among pinalanggang Nora

Akong kunsuylo kay nagalupad ka na kauban ang mga Anghel

 

Our Last Conversation

 

I remember the last time we had the chance to talk

You complimented me on how clean the walls of our house were

And joked that they won’t stay that way for long

You told me to keep the sharp edges of the cabinets and tables covered

Since the kids are already getting taller

You asked me not to put a lot of salt on the viands

And always cook vegetables

When I received the call just two days before Christmas

I knew you would never see how the walls would become dirty

Or how tall the children are going to be

Move forward, our dearest Nora

My only consolation is the fact that you’re already flying with Angels

 

Paolo M. Sandalo is an avid fan of music, comics, and video games. He has Taps, Mochi, and Sushi as his inspirations to wake up each day.

English Translation: paolo Sandalo

Illustration : Noy Narciso

Ang Balbacua sa Agdao Public Market

Poetry by | May 6, 2024

Pikpika sa kutsara ang nagaalisngaw
Nga kan-on aron mapatag
Ug pagbuhat og kanal kanal sa tunga niini

Iplastar ang panaksan duol
Sa imong nawong hangtod manggitik
Na sa mga buho sa ilong ang kahumot sa sabaw

Hanggab kausa unya hinay hinay nga
Ipuwesto ang panaksan ngadto sa
Imong mga ngabil—pagbantay kay makapaso!

Sigopa ang sabaw ug gamit imong mga
Ngipon salaa ang mga gamatoy nga piraso
Sa sibuyas dahon, paminta, unod, alud-od,
Ug usahay mga saag nga bukog

Usap hinay hinay ug ibutang balik sa lamesa ang panaksan kay pus-an kini nimo og duha o tulo ka sili dala wisik sa usa ka aping sa lemonsito

Tusloka ang pinakhumok nga parte sa tuhod sa baka gamit ang tinidor ug iplastar kini ngadto sa kanal kanal sa kan-on nga imong gibuhat kaganina

Kusnita ang unod ug tambok hangtod makakuha og bahin nga sakto ra maigo sa imong baba unya dimdima ang kaparat,
Kaaslum, kahalang ug kainit sa imong dila

Sundi kini og usa ka kutsara sa kan-on nga nagaalisngaw ug ayaw kaayo paspasa imong pag usap basi makatulo ka maka extra rice

Usaba ang proseso hangtod bukog na lang ang nabilin ug napulihan na sa kaputi sa sartin nga panaksan ang kapula sa sabaw—apan ayaw lang kini adlaw adlawa basin og magkita mo og sayo ni San Pedro

Paolo M. Sandalo is an avid fan of music, comics, and video games. He has Taps, Mochi, and Sushi as his inspirations to wake up each day.

Miaging Semana

Poetry by | June 28, 2021

Mahinumduman nako nga kanunay kang nagabagulbol
Nga atong katre daw sige na lang og kuyos sa kaguot
Kada gabii nga moplastar ka sa akong kiliran

Unya matod pa nimo akong mga hagok sama na
Sa tingog sa dakong barko nga padulong modunggo sa Sasa Port
Ug kasagaran maabtan na lang ka og kaadlawon
Bag-o makapiyong

Nga akong mga ilok kanunay nanimahong inun-unan
Bisan unsa pa nako kadugay og hugas ug lugod
Bag-o ko motupad nimo

Unya matag gabii na lang nato lalisan akong mga saag nga bungot
Nga maskin kada adlaw nako ginabarbas pirmi gayod motapot
Sa imong abaga ug mogitik nimo ngadto sa pagkaigmat

Ug matod pa nimo nga ang mga tiil-tiil sa atong katre
Wala damha kalit nagakurog unya bation ka og panglipong
Ug daw kasukaon basta magsugod na sila og kiling sa walay tunong

Apan mahinumduman sab nako ang mga panahon
Miaging bulan kadtong wala pa ka nagmabdos
Nga atong katre usa ka bangka nga naglutaw sa dagat
Ug ginalabyog-labyog sa mga balod ngadto diri

 

Paolo Andreo M. Sandalo is very much into music, food, pop culture, cooking and his wife, Taps. He just became a fan of Twice but is not planning to be alcohol-free anytime soon.

Miaging Gabii

Poetry by | June 7, 2021

Samtang matulog na ta
Gisaka nimo imong mga kamot ug nangutana ka nako
Kon itom na ba imong mga ilok
Sama sa lubot sa kaldero nga atong ginalung-agan
Nagpahiyom ra ko ug milingo

Kay wala man ka matagbaw sa akong balos
Gibira nimo imong biste paibabaw ug gipakita nako ang itom nga linya
Nga nagdagan sa imong tiyan ug gigiya akong mga tudlo taas niini
Nga daw nagsusi og mga detalye sa mapa
Nangutana ka kon butod na ba ka kaayo sama atong
Nakita nato nga kamprag sa kilid sa dalan katong takdol ang bulan

Unya giliso nimo imong ulo pakilid ug nangutana kon
Mobalik pa ba imong liog sa karaang pagkahamis ug pagkapution niini
Naningkamot ko og pugong sa akong panghuy-ab unya nakita nako nga
Mibaliskog imong mga kilay timailhan nga nairitar na ka
Pero kalit lang nawala imong kasapot ug miingon ka nako
Nga nakabati ka og gaan nga sikad

Paolo Andreo M. Sandalo is a big fan of music, cartoons, pop culture and his wife, Taps. He spends his weekends doing the laundry and looking up recipes online.