Tag: Mark Kenly Oray

Nanampit ang kalibutan
nga imong saw-an
kining pribilehiyo.
Maong gibukhad mo’g dako
tibuok mong lawas,
gihubo ang sapot sa kataha,
gidupa tanang pangandoy.
Karon, gitugyan sa mata mong
manag-iya nianang wanang,
aron bisan ang adlaw
mouban kanimo pagdamgo.

Ang panganod molumba
sa yanong tinguha,
ug bisan sa layo mahidagsa,
pahinungdan pagbalik
ang maong yuta.

---

Mark Kenly Oray is a Bol-anon writer and educator. He was a fellow at the 3rd Sunday Club National Writing Workshop, the 21st Ateneo de Davao University Summer Writers Workshop, and the Agi Creative Writers Workshop. He is pursuing his master’s degree at the University of the Philippines Cebu. He was born in Bukidnon.

Kadtong nag-uwan og bayot
wala namatay ang Ginoo. Wala
sila migimaw gikan sa gusok
sa mapangahason, ni sa bangaw. Apan
nahimugso human midagayday ang luha
sa kinaiyahan. Niadtong maong unos
gilukop sa lunop
ang matag suok sa kalibutan,
ug gibunyagan og bag-ong ngalan
ang lapok nga gialimungawan
ilawm sa tunggo, sa karaang atabay
sa mga libaong, sa datag. Ang huyohoy
sa pamayhon mikulit. Ug
sa maong banagbanag
midagsang sa matag wait
ang way kinutobang buhakhak.
Ug sa maong panahon,
natukod ang bag-ong doktrina, bag-ong kapilya,
bag-ong skwelahan, bag-ong kusina, bag-ong plaza,
bag-ong police station, bag-ong republika, bag-ong rasa.
Puros na bayot.
Wa nay luha.

---

Mark Kenly Oray is a Bol-anon writer and educator. He was a fellow to the 3rd Sunday Club National Writing Workshop and the 21st Ateneo de Davao University Summer Writers Workshop. He was born in Bukidnon.