Tag: Lolot S. Pana-ad

OK-OK

Poetry by | June 28, 2021

Okay ra na. Mawala ra ning
pandemya. Basta mag-ampo ta
kanunay kang Lord. Ayaw nag pangutana
kon kanus-a kutob ta magluklok
sa panimalay. Okay ra lagi na.
Agwanta lang mintras nayagaw pa
ang mga halangdon nga maka-porsento
sa atong buwis. Aynag palag parehas
sa mga tawo nga nagbagutbot sa gobyerno.
Okay ra na, basta ayaw paminawa
ang kasaba diha sa balita. Pek News na
kon puros negatibo! Hunahunaa nga buhi pa ka.
Pagbantay-bantay na lang anang birus
ug pasagdiha ang mga dinakpan ug gihikawan.
Okay ra na. Pasalamat lang ni Lord
nga naa pa kay ikagasto. Pag-Tiktok nalang
kaysa mabulabog sa mga nag-aligutgot ngadto
sa nag-manyanita. Maypa magdagkot kag dolomite
unya ihithit kini sa pinunit nga tambutso.
Pakapini dayon og kerosene para mental health.
Okay ra na. Pagpuyo lang diha kaysa malakip ka
sa statistiko sa nagkasakang mga kaso sa nagsakit
ug nangapanaw. Kon duna kay angay pasanginlan,
kadto nangaipit sa kapit-os kay sigeg gawas-gawas,
labi na tong gapatagad sa ilang plakard.
Okay ra na. Sala bitaw nga matawo og kabus
matod pa ni Santo Bo Chanezs. Iya-iya lang ta
sa pagpaningkamot. Sa sigeg bagutbot,
ingnan pa lang salot, terorista o komyunista.
Okay ra na. Pati ang hinungdan nga naabtan
tag pandemya—gumikan sa Amô nga gatila
ug gatsupa sa dragon sa Tsina—malubong ra
gihapon sa kalimot. Okay ra gyod na, basta
tumani lang ang yawyaw sa Amô sa Palasyo
susama sa atong pagbinut-an kang Tatay God.
Tan-awa imong mga idol nga silang Mocha,
Maharlika, BanatBy, Badoy, Thinking Pinoy
ug Sasot. Nagpahayahay sa ilang lawak.
Gabulatik sa kamaayo ni Tatay Amô,
daw gatsupa sa iyahang lagay diha
sa mikropono nga ilang gisibya-sibya.
Ilaron ra ka anang mga doktor ug iskolar
sa nasod. Aynag palag ni Amô, Baboy,
ug Tiki sa Palasyo. Magpatoo lang
sama nilang Senado Sotsot, Gago, Boto
ug uban pang sipsip sama ni Sekretaryo
Kiki da Turd. Okay ra na, basta pagluhod
diha sa inyoha ug pag-ampo. Ma-okay ra lagi ta.
Timan-i gani, inig hanaw sa pandemya,
mag-party-party ta sama sa manyanita
ni Tubol Desinas, ang berdugong butakal.
Apan sa higayon nga mangamustahay ta
sa usag-usa aykog pangutan-i
kon tawo pa gihapon ta.

***
Lolot  S. Pana-ad is a freelance SEO writer based on Mindanao.

Retard Stud

Poetry by | April 19, 2021

“Thrust of the spark that burns
Unbounds, departs, returns
To pluck out of death’s fist
A god who dared to resist”

—Ruben Cuevas, “Prometheus Unbound

Dayag ang dinanghag sa mga namakpak sa tikasan.
Ulipon sa mga atik ug alagad sa tampalasan.
Tiguwang apil batan-on puros nagpalubot sa tirano.
Errare humanum est apan puyra gaba ang nagpa-uto-uto.
Resbakan ang mosupak! Maoy gibagutbot sa ilang diyos.

Tiguwang apil batan-on gitorjak sa berdugong utganon.
Amahan kuno sa nasod, apan bugaw sa mga langyawng pikoton.
Rakrakan ang mosupak! Maoy kuro sa mga tagasunod.
Dayag gyod ang dinanghag ug damak sa mga taga nasod
Samtang sihag ang tingsi sa gino-o nilang tambaloslos.

Lolot is a freelance SEO writer based on Mindanao.