Tag: John Carlo Patriana Beronio

Gibira ka sa imong pagdamgo
ug nitugpa balik sa kalibutan.
Namukaw ang bugnaw mong singot
nga nikamang gikan sa agtang
paingon sa imong tutunlan.
Nipis ang hangin karong gabhiuna.
Nilalom imong pagginhawa.
Nituskig imong lawas sa katre
ug napabiling naghinanok.
Maskin gusto nimo tawgon
imong igsuon sa pikas kwarto
apan way mogawas sa baba.
Imong kauban mao imong gihunahuna
nga kini na ang kataposan.
Nipaspas og pitik imong dughan.

Sa wa pagdugay
niuyon imong mata sa kangitngit.
Hinayhinay nagporma ang usa ka tawo.
Nagtuk-ong ibabaw nimo,
nagtan-aw sa imong pagtulog.

---

Si John Carlo Patriana Beronio kay usa sa mga poetry fellows sa niaging 2018 Davao Writers Workshop.

Sa kadugayon sa inyong panag-uban
kon tan-awon iyang hulagway
murag wa may kabag-ohan.

Parehong nawonga ang mamukaw,
mangasaba ug mosugat kanimo
kon di ka matulog sa udto.

Pero kon tutukan nimo’g ayo
sama sa paglutok sa iyang mata
sa platong wala nahugasan, makita mo

ang mga abog nga namilit sa aping
ug liog, sa imong tsinelas, abuhan,
sa kalsada na gisuroyan og binaki

ug ginanggang. Daghan nang linya
sa agtang kada badlis pagpabadlong.
Kahumot na pud siya sa bareta ug klorox.

Sa binugkos niyang buhok nagtabun
sa nalagas nga bahin sa ulo. Napagaw na sab
sa kakapoy sa sige’g yawyaw

kada buntag, nga karon igo na lang
sa pagmaymay
ug tambag.

---

John Carlo Patriana Beronio kay usa sa mga poetry fellows sa niaging 2018 Davao Writer’s Workshop.