Sa kadugayon sa inyong panag-uban
kon tan-awon iyang hulagway
murag wa may kabag-ohan.
Parehong nawonga ang mamukaw,
mangasaba ug mosugat kanimo
kon di ka matulog sa udto.
Pero kon tutukan nimo’g ayo
sama sa paglutok sa iyang mata
sa platong wala nahugasan, makita mo
ang mga abog nga namilit sa aping
ug liog, sa imong tsinelas, abuhan,
sa kalsada na gisuroyan og binaki
ug ginanggang. Daghan nang linya
sa agtang kada badlis pagpabadlong.
Kahumot na pud siya sa bareta ug klorox.
Sa binugkos niyang buhok nagtabun
sa nalagas nga bahin sa ulo. Napagaw na sab
sa kakapoy sa sige’g yawyaw
kada buntag, nga karon igo na lang
sa pagmaymay
ug tambag.
John Carlo Patriana Beronio kay usa sa mga poetry fellows sa niaging 2018 Davao Writer’s Workshop.