Panahon sa COVID, kato Agosto 8, 2020, mipanaw akong Lola. Nag-umbangol akong mga iyaan kay mibiya na ang ilang mama, among Lola. Mao kato ang pinakauna nga mawalaan kami ug usa sa among mahal sa pamilya.
Wala pa mabalsamar akong Lola, dili kami pagawson sa gawas. “Diri ra mo sa sulod, bantayi inyong Lola, ayaw mog hawa.” “Ngano man?” “Kay basig ilisan ang lawas sa inyong Lola ug walay mubantay sa iya.”
Pasado alas 5 sa buntag, gikuha sa St. Peter akong Lola aron ibutang sa lungon ug preparahan ang haya. Miabot ang St. Peter alas 5 sa hapon sa Agosto 9, mao kato ang unang haya sa amoa. Samtang nagtáod sa trapal, gisabit sa akong uyoan paboritong karsones sa akong Lola ug miingon, “Kini, syarog muulan pa ni.”
Sa adlaw sa vigil, busy ang tanan sa pag-andam ug pagkaon para sa bisita. “Bawal jud iuli ang pagkaon pag gikan sa patay kay sundan jud ka ana niya.” “Ngano man sundan?” “O basin aron dili mahurot ang pagkaon dayon,” pasiaw nga ingon sa akong kuya. Matag adlaw, among sud-an puro ra baboy—pinirito, sinabaw. “Mama, nganong wala man niy mga gulay-gulay?” “Ay, bawal ang gulay nga magkatay-katay kay mukatay sad ang mamatay.” Wala ako katingog kay tanan bag-o pa sa akoa.
Adlaw sa lubong, gihatod among Lola sa lubnganan. Miadto mi sa simbahan aron misahan ang iyang kalag. Giuban ang mga braha ug mga gamit sa lubong. Gitawag ang myembro sa pamilya aron musuong sa lungon. Adunay misinggit, “Ayaw na mo ug balik sa inyong giagian.” Wala ako milingi ug mibalik pa.
Sa dihang mibalik akong ig-agaw si Gwen kay nabilin iyang cellphone, daghan ang mitawag sa simbahan. “Nibalik si Gwen.” Mi-contact sila aron mangita ug piso nga manok isabay ug lubong.
Lima ka tuig ang milabay, mipanaw mama ni Gwen.
Joemar James Bansil is a graduate of the University of Southern Mindanao–Kidapawan City Campus with a Bachelor of Secondary Education Major in English. He is currently pursuing a Master of Arts in Literature at the University of Southeastern Philippines, where he continues to deepen his passion for language and literature. He currently teaches Research at the Philippine Women’s College of Davao. As an educator and storyteller, he is passionate about using stories and words to inspire, connect, and give meaning to human experiences.