Unong ug pangaliya sa kasubo
sa kamatayon sa mahigugmaong kadugo
sa gisalikway ug giluibang putling gugma
sa gilipotang tiunayng higala
sa pagkawagtang sa gihagoang patigayon
sa pagpapas sa maalagarong pagpanilbi
sa pagdagsa sa makapahisalaag nga mga kabag-ohan
Ang kalangitan ug kawanangan
nalukop sa kangitngit
kay gitabilan sa dagtomg dag-om
nga nagpabunok og galusok nga mga luha
aron mobasbas ug mobanlas sa pagkaylap
sa kahulaw ug kahaw-ang nga kahimtang
sa mga nadutlang lumulupyo sa kalibotan
Ang hanging galaposlapos sa paglabay-suroy
nagbiyobiyo sa paghaguros ug paghampas
aron abugon [tayhopan] ang malas ug pasutuyon ang mga tunglo
ug panghimaraot samtang di makaturok ug makagamot
sa mga kahiladman ug kasingkasing sa mga nawad-an ug nasamdan
ug hinuon sila mahulipan sa kahupayan ug paglaom
ipanghupaw ang pag-ampo nga mopatigbabaw ang kaayohan.
September 22, 2022
Elvi is a poet and Visual artist based in Davao City. He holds a Bachelor’s degree in Philosophy, a masters degree in Theology, major in Pastoral Ministry both from Ateneo de Davao University.