Samtang Gahulat

Poetry by | May 13, 2018

(a translation of Jerry B. Ignacio’s Pagpapalipas Oras by Adrian Sefuentes)

Unsa ba ka taas ang mga higayon?
Sa uma, nangabuhi na ang mga tinanom,
ang mga abugon nga yuta sauna,
gigakos na sa kabagnotan.
Kadtong hingtabok ka sa pilapil
aron lang maghulat ug masakyan
lapok ang nakabukhad sa imong giagian.
Karon, paspas na ug padagan ang mga dyip
sa espalto nga dalan.
Wala nay mga abog nga musoksok sa imong ilong,
mupuling sa mata, ug maoy hinungdan sa ubo ug hubak.
Di na ka karon atakehon kung ting-init
bisan pa og mamaklay ta ilalom sa silaw sa adlaw;
di parehas sauna pirme kang maugtas
matag abot nato sa baybayon
ug dili nalang ka maligo
kay di ka ganahan matilawan ang kaparat.
Paminaw nako, nakuhaan na ang asin sa dagat,
pati ang balud hinay na sad mubaklay
paduol ug palayo ngadto sa aplaya;
apan hantod karon, wala pa gihapon ka.
Gaihap na siguro ka og paldo-paldong kwarta
dira sa yuta sa gatas ug dugos;
samtang ako, gisum-olan na ug tan-aw
sa mga kamot sa relo, sa pagpupo
sa mga dahon sa kalendaryo, sa sigeg suwat
sa akong mga kasakit sa tala-adlawan.
Suwat nalang nimo nga way tingog-pagpanambit
ang maoy akoang konswelo,
alang-alang kay niana ka: Dili bukid ang oras
na masukod kung pipila ka ektarya,
o dagat na masukod kung pipila ka milya.
Ang paghulat sa hinigugma susama lamang sa kadugay
sa maantos sa kasing-kasing nga mupadayon sa
pagpanawag.


Adrian Sefuentes is a third year Creative Writing student of UP Mindanao.

Dili Ko Mulimod

Poetry by | June 11, 2017

Dili ko mulimod nga ako gimingaw
sa imong tingog nga mura ug mga hunghong
sa hangin mata’g alas tres sa kaadlawon-
hilom, bugnaw, ug aduna’y mga sikreto
na dili angayang ibutyag sa kabuntagon.

Dili ko mulimod nga ako gimingaw
Sa imong mga gunit samtang kita duha mutabok sa dalan.
Ang imong mga palad nga gaspang, singtanon,
ug dili dayon mubuhi sa kahadlok
na basin imo kong mabuhian ug mabiyaan.

Dili ko mulimod nga ako gimingaw
sa imong mga ginagmayng pahiyom
na wala lamang gapundo sa imong mga ngabil
pero muabot ngadto sa mga singkit mong mata.
Mga pahiyom na napuno’g mga misteryo ug pangutana.

Dili ko mulimod nga ako gimingaw
sa mga ginagmayng butang na atong gisaluhan,
mga sikreto ug kamatuoran,
mga hunghong ug katawa,
mga paglaum ug pangutana.

Apan dili sab ko mulimod nga ako gimingaw,
sa mga panahon na wala pa taka nakaila,
sa mga panahon na ako lamang ang akong nailhan,
kay karong panahona hinay hinay ko na usab na ginabalik
ang mga panahon na wala pa ka sa akong kinabuhi.


Adrian Dwight Sefuentes is a second-year Creative Writing Student of UP Mindanao.