Sa damlag, mobangon na sab kong
gihangop sa imong pahumot.
Manamilit na ang atong panit—
nangpilit, nanglambod
niining mahuyang nga higdaanan.
Hinaot pasayloon mo ang kalibotan
sa iyang apuradong dagan.
Dili tanang butang mahisama
sa lab-as nga banak nga gipalit nato
miaging semana. Sumala pa sa imong nabasahan,
saphigan og tinta sa mga mananagat
ang kinadakuang isda nga gipamasol.
Ipatik sa katsa. Ipanghambog
ang nabingwit, kay ang handurawan
sa umaabot mopanas, waswason
sa mga sulog sa atong pagkalimtanon.
Maihap ra usab sa akong tudlo
ang mga gutlong motapot ning gugma.
Mapasalamaton kong gisaw-an ta
kining yam-is nga kabuntagon.
Sa dili pa ta lamoyon
sa hinaganas sa matag-adlaw,
ipatik ko ang imong paghinanok
sa akong panumduman.
Itugyan ko ang kahidlaw
sa akong panit sa imong katsa.
Bukotan ko ang kahuyang
sa imong lawas og habol
habi sa mga buot kong iingon.
Ug dili na kita tun-ogan sa kamingaw
samtang gaandam kong molakaw.
Si Clint Jovial Delima usa ka fourth-year BA English (Creative Writing) student nga nagtungha sa University of the Philippines Mindanao. Nahimo siyang fellow sa 2025 Davao Writers Workshop, 2025 Cagayan de Oro Young Writers Studio (CDOYWS), ug 2026 Bathalad Sugbo.