Padayon ang pagdagayday sa tubig
nga gikan sa sapa sa bukid,
paingon sa suba sa Cabulig.
Mahanoy ang lagaslas niini
samtang nagadakdak sa bunal
ang mga dagang inahan sa daplin,
aron mawagtang ang mantsang dalag
sa bisti sa ilang mga batingot nga pinalangga.
May kasikas usab sa lawom nga bahin,
samtang nagtabisay ug nagduwa ang mga batan-on;
puno sa kalipay ug pagsinggit-singgit,
hawan sa kaguol, kay ang tino lamang
mao ang kasadya nga dala sa kabugnaw sa tubig.
Walay sama ang gasa sa kinaiyahan!
Apan sa pag-agas sa katubigan,
mao sab ang pagkahanaw sa mga balas sa ilawom.
Walay puas ang pagpangsako sa grabas
aron isagol sa pagpahimutang sa mga balay sa kalungsuran.
Nanganindot tuod ang mga balay ug establisyemento,
Padayon sa kanunay ang trabaho ug negosyo
apan ang suba padayon sa pagkalawom
nga mamahimong hinungdan sa kadaot
og pagakatumpag sa pundasyon sa kilid sa yuta.
Padayon lagi ang pagsaka ug asenso sa kalungsuran,
ibabaw sa gilubong nga buhi nga kinaiyahan.
Nympha Amor H. Eugenio is a public secondary school teacher in DepEd Misamis Oriental Division. She teaches Creative Writing under the Special Program in the Arts (SPA), nurturing the next generation of local writers.