Usa ka ekprastik nga balak alang sa pintal nga abstrak ni Conflict Crafter nga ginganlan og “If You Say So.”
ang
kinalawman
nga langit sa langit
matung-as kaha sa mga kumagko
ni—Moses sa mga pag-ampo pinaagi
kang Maria nga ulay tingali? kanunay
o dili—
sa mga halad ko kang Manama ania
ang tari ni tatay
dili ra mahayon—para asa sab
ning krus sa akong agtang?
sa akong adlawng natawhan way miingon
ikaw ang balay nga among panalipdan
gipintalan sa samang dugo
ang mga ligid sa bag-ong awto ni uyoan—
Manama, imo sab ba ilayo ang mga pasahero
sa disgrasya? kun ang gitakdang
manluluwas mao ang gabitay sa samin
miingon siya
pagpasaylo aron mahunaran ka
diay ba? sala kining gikumkom ko
nga kasakit—sukad
sukad—diay? makalipong ning hustiya
nga imong gipa-om-om nako
—Ginoo, mupundo ra sab ba ka?
sa akong nagkutoy nga tiyan—wala man kiniy sustansya
kay lagi ikalibang ra—ang pagtoo kun ang kahakog
nay mupatigbabaw ania ang bulawanong korona
hinimo sa angkan ni adan alang nimo—hari—
ginikanan—imong balay maoy among simbahan
sumbanan—tabangan tika og salibay sa mga la mesa
miingon siya
nein! nein! —diha ka?
nada! oy, nada! asa mag-gikan ang kamatuoran?
ang esenya sa mga sistema sa kahulogan kinsay magboot?
si Fyodor? Si Santiago?—идиот! Ginganlan
gani ko nilag Magellan. Ako sab daw si MacArthur
—ug ang mga gabuhakhak nga mga di-ingon-nato sa sapa sa Mandug—ako sab
ang mga nagpanon nga armadong katilingban sa pagpa-ak
sa kangitngit ngadto sa katahom—mutago, mubutho
aron gukdon sa balaod ni Apo—
ingon-nako ingon-nato
—daw ako engkanto binistidahan og puti ingon ang bapor
tao ra sab ni sila gigiyahan sa ilang gituuhang
hustisya kay kun imong subayon akong lugar nga
natawhan ania si Zobel-Ayala sa pikas kanto si Bonifacio—
si Urduja nag-inusara sa Obrero—et toi?
pa-hero hero. way hingpit—
ang panahon dili na mubalik
igo ra hubaron—hubaran
gamhanan ang nanag-iya sa kahulogan
nga gisalom sa kinatas-ang impyerno sa
pagkatao pinaagi sa dulom nga gabii
sa akong lawasnong kalag
ayaw kalimot og haw-as
miingon siya
sul-uba—ang amakan nga among payag ug
ingna ko kun di ka mangatol kay akong—
sugnuran ug kun dili ka ako nay
mutangtang sa bulawanong taplak
ani imong alampat—
iyang korona—iyang templo
ang oro nga bukid sa luyo
—saksihi sa akong pag-langkat nga wala
ang ngalan sa magmumugna
sa wala!
Si Reah Izza Paglinawan usa ka magtutudlo sa University of Southeastern Philippines sa dakbayan sa Davao ug estudyante sa literatura sa Silliman University sa Dumaguete. Mabasa ang duha sa iyang mga minugnang sugilanon sa Katitikan: Literary Journal of the Philippine South ug diri sa Dagmay.
