Ang mga lagiti sa kawayan
Maoy nahimong musika
Sa kalanggaman nga mibatog
Sa punuan sa bayabas
Ibabaw ni anang lim-aw nga tubig.
Diin mikisaw ang tilapayang
Midagit ning akong taga.
Kining mga wati nga nanghiwid
Ning akong bagol maoy akong
Gikalingawag tadtad.
Wa usab ko masayod nga niwang
Diay ning akong napilian
Gikan sa ilawom sa banggerahan.
Gitahi ko ang ulod
Gamit ning maong taga
Aron mukapyot ning akong pasol.
Dangog apan humok
Ra siyang mipa-uraray
Human giitsa sa lim-aw
Kauban sa akong taga ug naylon.
Gikubit ang akong paon.
Mitingsi ang akong dagway
Sa kalipay nga dunay
Nailad ning maong ulod.
Mikisaw ang tubig,
Gibira ang naylon,
Nainat,
Nabugto.
Milutaw ang maong hikot.
Wa nay taga ug paon.
Mikisaw ang tubig
Ug misuksok sa layang palwa
Ilawon sa lim-aw
Ang ikaduhang tilapyang
Nagdagit sa iyang
Kalami ug kasakit.
Si Shaira S. Camsa usa ka inahan ug magtutudlo nga gikan sa Davao Oriental State University-San Isidro Campus. Nahimo siyang fellow sa balak sa Ateneo de Davao University Summer Writers Workshop 2024.