Ako na lang isulod sa selopen ning bukog
para sa iro, yawat na lang.
O iapil na lang ning mumho,
ayaw, kay malamog.
Puniton kining sinsilyong gilabog
sa bata sa parkenganan sa Uyanguren.
Pastilan! Yawat na lang dili mabuo ang piso
kon walay sentimos o baynte singko.
Ayaw sa ilabay ang daang medyas naghimulbol.
Maayo na lang na ipasuot sa gripo,
aron masala ang hugaw.
Pil-a ng selopen ayaw ilabay
ayaw komuta, pil-a yawat na lang
magamit butangang galay
o magamit kung dunay e tek hom.
Pil-on kining brawn nga papel nga supot sa pandesal
Pagpaga ang pino nga asukal.
Yawat na lang madrowengan sa mga bata,
paghaling , pang-ilo.
Tilukon ang sinsilyo sa gamayng pitaka.
Isuksok ang nag-halok nga tudlo ug kumagko
aron makuot ang sinsilyong naghuot.
Yawat makapalit posporo, lamas o sigarilyo o hebi o kendi.
Oy punita nang nagkalat nga bugas
yawat na ni, usa nani ka kutsara,
ayaw intawon usik-usika.
Dyes por kilo na ang kuha, magabaan unya ta.
Punita ng butones, yawat na lang,
ipuli sa nasaag nga butones
sa pantalon , uniporme o polo.
Bisan sa usa ka tiguwang yawat na lang.
Bisan poste iya paldahan, patulan
daginoton gyud.
Apila nang sabaw ug lamas nga nabilin,
Higopa, soyupa,
Ayaw ilabay yawat na lang
molasa atong bahaw.
Ayaw usika ang panahon,
ayaw ibaligya ang boto sa eleksyon.
Yawat na lang ning mga pasalig uban sa
noodles, odong ug tinapa,
uban sa bugas nga gibukbok na.
Pasilong sa udtong dako
sa pilapil , ilawom sa manggang dako.
Yawat na lang ning gamayng kusog
maulian ang kabaskog.
Magpahulay sa bugnawng semento.
Isandig ang likod sa rehas nga gitaya.
Yawat na lang ning makapahulay sa udto
para maayong tratar sa kustomer mismo.
Tanang butang nga napud-pud ayaw ilabog.
Yawat na lang makawalis og abog
Yawat na lang pan-os nga newspaper,
ilikit himuon og sigop.
Yawat na lang ning manok na giatay
Putlon ang liog , dugo ipalatay
aron mamatay.
Yawat na lang ning dayong kon mamatay.
Dunay ipalubong, ipakape, ipakaon.
Yawat na lng ning dunay gihaya
dunay paampo, dunay sugalan,
tong, ipalit og kape ang salin sa gitaya.
Suwat , yawat na lang
makasuwat kag handumanan
Dili man kita mga uranay sa katilingban.
Noy Narciso is an educator and multi-disciplinary artist. He teaches arts appreciation in Ateneo de Davao University. He loves to create DIY instruments and upcycle found and defunct objects.