Mialisbo ang baho sa labhunon
Sud sa karton nga gidan-ukan
Sa ubang sanina
Halapad kini, puti nga dunay puwa
Og mikaging na sa kadugayng han-ok
Imu dayun kining gihumol sa tubig
Sa katin-aw sa tubig, didto
Mingsalamin kanimo ang konsensiya
Misagpa kanimo ang bugnawng hangin
Nangurog og nanimbawt imong balahibo
Sa matag kusò, dunay pagbasol
Sa matag waswas, dunay paghinulsol
Gihayhay nimo ang tanang pagmahay
Naghinaot mauga kini sa panahon
Apan nagpabilin sa gihapon ang mantsa
Sa puti nga lampin nga
Gigamit pangputos sa batang
Naahat sa pag-utong tungod sa
Ahat nimo nga pagpangidaron
Niawas na ang tubig sa planggana
Way ondang sa pag-agas ang gripo.
Luis Bahay Jr. is a graduate of Bachelor degree in Elementary Education at Mindanao State University – General Santos City. He is currently seeving as a Sangguniang Kabataan Kagawad in his Barangay in Tampakan, South Cotabato.