Luyo sa nakatabon nga mga nawong
ang mga baba nga andam mopadayag
og kaguol, kasuko, ug paglaom
nga ang moabotay nga ugma hayag na unta.
Sa pagpahid sa singot sa agtang
sa pila ka oras og siniyagit sa kalsada,
dili moundang ang pagtuo
nga ang kainit sa mga panawagan ug pangamuyo
mudalag alimuot nga moalisngaw
sa bugnawng kalag sa gaharing buraot.
Mutulo man ang luha o
mokurog man ang tingog sa kasuko,
maski pa og tutokan og pusil ang baba
arun muhilom,
walay makapatay sa tawong
kamatuoran ang anting-anting.
Murag aso nga bisag kapila pa taguon
gamit ang kinumo,
mangita gihapon ang kamatuoran og
kagawasan.
John Gilford Doquila is a graduate of the BA English (Creative Writing) program of UP Mindanao. Presently, he is taking his graduate studies in history at UP Diliman.