Ang pagsugat sa bag-ong tuig alang kanako, usa ka kulba-hinam nga lumba sa dagan aron malangkat ang ganti nga makatuntong ang imong tiil sa dakong entablado – ang kalibutan nga gasa sa labawng makagagahom ug ang pagsimhot sa unang hangin nga mohapak sa atong aping.
Ang nagsugwak sa nagdasok nga mga tawo ang pagpamalit og pagkaon kay ang lingin nga prutas, bino ug mga sapot nga lingin-lingin ang drowing tungod sa tinuhoan nga simbolo kini sa kwarta og grasya.
Kadaghanan sa Pilipino, lumad o Muslim alegre kaayo sa maong pagpangandam nagsugod tapos sa pasko. Dako kinig hagit sa matag Pilipino ang pagsugat sa bag-ong tuig nga mag-awas-awas ang pagkaon, ilimnon, kwarta mao nga sayo pa lang daan gipangandaman na kini sa matag Pilipino. Kon walay kwarta maningkamot gayud ang ordinaryong Pilipino sa pag-prenda, pagkopras, panghurnal, pagdawat og labada aron maka-kwarta. Ang mga magtutudlo inubanan sa pag-ampo, nga untana ihatag og sayo ang PBB.
Naa koy nakasakay sa dyip, gikan kog NCCC- Uyanguren. Sa dihang nihunong ang dyip sa Victoria Plaza, dunay nisakay nga trabahante sa maong tindahan diri sa Davao. Morag naa pa sa bente anyos iyang pangedaron, hitsuraan gamay ug samtang nakig-istorya siya sa telepono wala nako kapugngi nga maminaw sa iyaha. Sigurado ko nga ka-istorya niya ang iyang inahan, kay nanay ang pulong nga iyang gigamit. Ang iyang tingog daw sama sa hangin nga bugnaw ug buotan kaayo, morag gakson ug halukan ang imong aping sa kamingaw. Pung niya sa iyang inahan, “Nay wa ko kapadala og kwarta nay kay wa koy bakanteng oras, wala pa pud koy sweldo nay. Sige lang nay kay naa man koy gamay nga kwarta diri, ako lang ning ipadala nimo nay.” Akong huna-huna kabuotan ba ning tawhana, nindot pangutan-on og asa iyang probinsya apan na-unhan ko sa kaulaw niatong higayona.
Nagpadayon gihapon kog paminaw, pung niya, “Si manoy nay, bag-o lang nagpakisame.” Matud pa niya “Si Tatay diay nay asa?” Daw gikumot akong kasing-kasing paglitok niyag tatay tungod kay ang akong amahan adunay balatian nga prostate kanser nga iya nang gibati pipila na ka katuigan hangtod karon. Ug tungod sa pag-inom sa mahal nga mga tambal, himsog gihapon tan-awon ang akong amahan.
Sa akong huna-huna kinahanglan tulo ka-adlaw sa dili pa muabot ang bag-ong tuig, naa nako sa yutang gidak-an sa akong mga ginikanan. Sa dili pa nato sugaton ang bag-ong tuig, nakasinati ang atong nasud sa bagyo, baha ug ubay-ubay ang nawad-an og bay labi na sa Lanao del Norte, patigayon sa Cagayan de Oro ug ang bag-o lang nga sunog sa dakbayan sa Dabaw nga nikalas og 37 ka batan-on nga mga call center agents.
Dili lalim nga sugaton ang bag-ong tuig diin pipila ka pamilyang Pilipino ang nagbangutan sa kamingaw sa ilang pinalanggang kabanay ug ang kahuot sa ilang dughan sa pag-sugat sa bag-ong tuig.
Apan dili gyud nato kapugngan ang umaabot nga nagdilaab nga bag-ong tuig ug gikan sa akong kasing-kasing akong ipadangat sa tanan nga atung sugaton ang bag-ong tuig nga puno sa katakos. Dili kita magpalupig sa unos nga atong nasinatian. Kitang tanan makig-hiusa nga dumugon ang pagsugat sa bag-ong tuig àrun magmadaugon kita ug dungan nga atong yatak-yatakan ang malas sa tuig 2018 pinaagi sa kinasing-kasing ug matinud-anon natong pag-ampo sa atong labawng amahan. Pinaagi sa pagsalig ug pagtoo mahimo kitang palaran sa lumba sa kinabuhi sa tuig 2018.
Si Jed P. Acero kinamagulangang anak Ni Jeden Acero og Bienvenida P. Acero nagpoyo sa Barobo, Surigao del Sur. Sa kasamtangan, usa siya ka byudong buhi kauban si Kadiya, usa ka tanom nga gitawag og Holy Basil.