hindi
ko alam kung ano
ang nasa pagitan natin
noong gabing iyon
habang ginagalugad
kung saan pahihimlayin
ang mga salita
o baka naman wala
talagang nasa pagitan
katulad ng nawalang paligid
habang naghahanap
ng mga signos
sa pagitan ng sulyap
at usap
dayap
sa sugat ng ngayon
at nakaraan
ang pamamaalam
may ngiting nais
sumulyap
sa mga mata ko
subalit sinaway ito
ng mga mata mo
kilala nila ako
kapag ganito
kakorni ang simula
trahedya ang wakas
ng hinahabing
tula at kuwento.
German V. Gervacio is a Palanca award-winning author who teaches at the Filipino Department of MSU-Iligan Institute of Technology. He is the incoming representative of Northern Mindanao in the National Committee on Literary Arts for 2017-2019.