Sa tibuok adlaw natong
pagdawat sa
abog
singot
ulan
dalugdog
kilat
init
igang
kasaba
busina
pliti
sukli
sweldo
pagpanguhit
pagpanglimus
pagpangusi
pagpangasaba
ug pagpangulata
niining dakbayan
sa atong lawas,
Karong higayuna
Sa atong kaugalingong
Suok niining lugara
Kita ang hari ug rayna.
Ate/Kuya
usa ka long neck
guha ka platitong mani
usa ka large nga Nova
Unsa’y chaser, Ma’am?
Unsa may naa?
Apple blend
Calamansi blend
Dalandan
Pineapple
Pineapple, Ate/Kuya
Mura’g ritwal nga gisugdan
Ang pagpanaguban og
Kumusta naman?
Okay lang. Busy.
Kahilom
Niabot ang gi-order
og gisugdan na
Ang rason sa paganhi
mao kaha?
Kada yarok sa rhum
mao puy pagpanggawas
sa kainit sa
aping
liog
dughan
ug pagpangaslum sa
dila
kuto-kuto
tiyan
ug pagpanghapdus sa
mata
ilong
tuntunlan
Mga pangutanang
dugay na gilubong
sa kinasuokan
sa akong
alimpatakan
namuhi sa akong baba
sama sa mga batang
taud-taud nang
wala makalaag
Sa imong panghuna-huna
Nagsuroy-suroy sila
Kinabugatan sa tanan
Ngano?
Ug imo kining natubag sa kahilom
Niining suoka
Ikaw ang hari
Ako ang rayna
Apan, nilubad na ang lumay
Manguli na kita
sa atong kaugalingong
mga suok
—
Mai Santillan is a freelance content writer in Cagayan de Oro City. She, along with her friends from Xavier University, founded NAGMAC (Nagkahiusang Magbabalak sa CDO), a community of young poetry enthusiasts in the city. Once a month, they organize CDO Poetry Night.