Pagsuwat og Balak

Poetry by | September 30, 2012

Naningkamot sa pagsuwat og balak,
dagkong singot ang mitulo sa agtang
makita lang ang mga pulong
nga modakop sa akong kahulogan.
Nagsugat ang mga kilay sa paghunahuna.
Nanagat og inspirasyon sa lain-laing dapit,
maskin gagmayng butang hatagag bili,
Sa panghinaot nga unta ang mahimong balak
basahon sa mga mambabasa
ug makakita silag imahe, makabatig emosyon
ug labaw sa tanan, makaingon sila
nga kining suwat nimo, Doy, balak gayod!
Dili yaga-yaga sa pinulongang binisaya,
Dili ulaw-ulaw sa literaturang Bisaya,
Ug pwede ipasigarbo sama sa mga buhat
Sa iladong magsusulat nga Bisaya.

Apan, hangtod karon, pakyas gihapon.
Padayong nagtulo ang dagkong singot,
Nagsugat ang mga kilay,
Nanagat og inspirasyon sa bisan asang baybayon.
Bisag pakyas ako,
Sa ngalang taga-Mindanaw ko
Ug midako sa Tagum,
dili ako moundang,
dili gyod ko!

(Lagi. Kinahanglan gyod writing spirit.- Macario Tiu, ed.)


Si Reymond Pepito migradwet sa AB Mass Communications sa Ateneo de Davao University sa 2012.

Leave a Reply

Your email address will not be published.

This site uses Akismet to reduce spam. Learn how your comment data is processed.