Ang Musika Sa Merkado

Poetry by | April 29, 2012

“Isda, isda” dungog nako sa pagaw nga tingog sa tindera,
“Baligya selopin” ingon pud sa gamay nga tingog sa bata.
Tuyok ligid pud sa kariton kang manong,
Nga ang sulod puros kangkong.

Sa agi-anan, aduna pud tagaktak sa sinsilyo,
Halin sa batang gapamaligyag sigarilyo.
Sa tindahan, sonata sa pirated nga DVD,
Gi-kawatan diay sa tao nga ga-ngisi.

Sa dalan, dyip niserbato atubangan sa motor,
“Hi-way, hi-way” siyaget pud sa konduktor.
Sa kilid-kilid, daghan gapamaligyaay,
Lumba sibat dayun dala siyaget, “naay mangdakopay!”

“Ngayo ko hinabang” ingon sa tigulang sa tungod,
“Prutas mga miga… suki” sa unahan pud ga-tukod.
Aduna pud gapanit-sit sa chiks sa atubangan,
Sa merkado, maski unsa imong madunggan.

Saba paminawon kung bu-ot huna huna-on,
Labi nag ikaw gahilom og sila imong paminawon.
Pero sa kadugay na nako diri nga lugara,
Mao nah ang imong matawag nga ilang musika.


Karen Mae O. del Puerto is reviewing for the NLE Board exam and is a part-time violin teacher in prep and elementary school in Cagayan de Oro City. This is her first work featured in Dagmay.

Leave a Reply

Your email address will not be published.

This site uses Akismet to reduce spam. Learn how your comment data is processed.