Maayong balita para sa tanan!
Duol mo diri aron inyong mapaminawan!
Masulbad na gyud ang problema natong tanan
Kay nagasubay na kita sa tul-id nga dalan.
Wala ba mo kamatikod?
Nga ang tanang pobre wala na gitamakan ang katungod?
Ang mga mag-uuma ug mga pesante dili na angay’ng moluhod
Kay ang tanang ani ug abot lunhay na ang pagkaapud-apud.
Naghinayhinay na pud ug kahurot ang mga salawayon
Kay ang atong kapulisan andam na pirme ug maalagaron.
Ang mga kawatan sayon nalang kaayo pangdakpon,
Ug ang mga pork barrel dili na kurakuton.
Padayon lang kita sa pag-export ug mga produkto,
Sila pud bitaw mohatag kanato ug sinako.
Mas maayo pud kung mangapil pud ta’g gawas
Kay aron ang kwarta mas sayon ug mas paspas.
Ligdong ang pagkabahin sa nasudnong badyet,
Kay gi-una sa gyud ang armas, bala ug bayonet.
Sa sunod nalang nang para sa edukasyon,
Makaya pa man siguro nila kung patas-an lang gamay ang twisyon.
Antos lang usa ta gamay kung mutaas ang kilo sa bugas,
Kay sunod bulan mo-roll back na man pud daw ang presyo sa gas.
Ma-antos pa man siguro ang bulad ug ginamos,
Mantiner usa kadiyot sa ginagmay’ng kapit-os.
Sa dili madugay, mo-asenso na gyud kita!
Kay ang dagkong mga nasud kanato nagabira.
Haduol na ang panahon nga sila ug kita mahimong usa na,
Ang atong pagka-uyamot masulbad na ana’ng taknaa!
—
Anneliese O. Lomboy was born in Agusan del Sur and studies at USeP.