Natawo si Saturnino Pinoso Apoyon sa Lincod, Maribojoc, Bohol sa Disyembre 24, 1935. Sa Bohol, nagtrabaho siya isip koresponsal sa Bohol Chronicle, ug sa edad nga 25, milalin siya sa Dabaw. Dinhi na siya sa Dabaw nagpuyo sulod sa kapin 50 anyos. Sa Dabaw, nagtrabaho siya sa Department of Social Welfare and Development sulod sa 11 ka tuig, ug sa Philippines News Agency sugod 1980, ug miretiro sa 2001.
Bisan sa iyang trabaho, gipalambo niya ang iyang panulat, ug nahimong aktibo sa mga kapunongan sa mga magsusulat. Usa siya sa tigtukod sa Diwa sa Dagang Bisaya (DIDABI) niadtong mga tuig 1960, ug maoy unang presidente sa Davao Writers Guild, Inc. Siya ang nahimong representante sa Eastern Mindanao sa NCCA Committee on Literary Arts gikan July 2001 hangtod June 2004.
Ang iyang obra molangkob og 65 ka mubong sugilanon, upat ka nobelang namantala, 57 ka mga balak, ug daghang mga artikulo, komiks, ug pakatawa. Midawat siya sa unang ganti sa tigi sa Bathalad-Mindanao sa 2000. Ang iyang libro sa mga mubong sugilanon nag-ulohan og Ang Gakit ni Noebong ug Ubang mga Sugilanon (2008) gimantala sa NCCA ug Davao Writers Guild.
Isip pag-ila sa iyang mga nahimo sa pagpalambo sa panulat sa Dabaw ug sa Mindanaw, gihatag sa iyaha sa National Commission for Culture and the Arts ang Taboan Literary Award sa ika-3 Taboan Philippine International Writers Festival nga gibuhat sa Dabaw atong Pebrero 2011.