Ang dyipni drayber nagdaginot og pasahero
Yawat na lang makabawi kay mahal ang krudo
Ug iyang gipik-ap ang babayeng nagkargag bata
Sa gidiling sona diin naglurat ang dakong karatula
No Parking, No Loading, No Unloading
“Paspas kay dakpon ta,” matod sa drayber
Sa pasaherong nagtinikling sa guot nga sakyanan.
Apan kadakong demalas kay mas naglurat ang mata
Sa polis trapiko ug nasakpan ang drayber sa akto.
“Nganong namik-ap man kag pasahero
Nasayod man kang gidili dinhi kay makalangan sa trapiko?”
Tubag sa drayber: “Nganong ako man lay imong nakita?
Daghan mang drayber ang namik-ap og pasahero?”
“Ikaw ray mihunong. Mituyo kag hunong. Lisensya!”
Nangatarongag maayo ang drayber apan dili na maminaw
Ang polis trapiko sa kadaghang sakyanang gibantayan.
“Lisensya. Ihatag na ang lisensya!”
Naunsa ba nga mipaturatoy man hinuog dagan ang dyipni!?
Apan pagtabok niya sa tulay adunay duha ka polis trapiko
Nga nagwara-wara aron pahunongon siya.
Giradyo diay siya. Giatngan diay siya.
“Nganong miikyas ka? Lisensya!” ingon nila.
“Nasuko man god tong polis, Sir,” matod sa drayber.
“Wala na mi labot niana. Lisensya!”
Agoy, pagkaalaot sa drayber nga nanginabuhi.
Lagmit nag-ekstra lang siya. Lagmit wala siyay lisensya.
Imbis usa ray kaso sa pagpamik-ap nga dili sakto
Karon nadugangan na hinuog ubang kaso.
Nahabwa ang mga pasahero
Kay gustong makaabot dayon sa destino.
Intawon ang drayber nagdaginot og mumho
Nakulban na hinuog kaldero.
—-
Macario D. Tiu teaches literature at the Ateneo de Davao University. He is a multi-awarded writer and Davao historian.
sir pwede mangayo og copy nimo sa Engkwentro, kon ang pagbiya og balindog sir kay amo man gud ng topic sa literary criticism… wala mn gud nako makita sa net.. taob lang og bago aplaya sir… tnx sir