Wa pa gani miusbaw ang adlaw
Si Tiya, nagsugod nag latagaw
Sa gawas sa balay ginasugdan
chismis na murag way kahumanan.
“Dre’, kabaw baka sa nahitabo?”
“Day, kabaw ko unsa iyang tuyo.”
“Ay da! Baho daw kag ilok..”
“Siya? Tamad daw ug palahubog.”
“Unsa? Iya nang gi- ‘storya Piling?”
“Kabaga baya sa iyang aping!”
“Nya, puti ba di ay iyang ilok?”
“Bagag nawng! Mura bayag mulihok!”
Daghag mag-amigo ang nag-away
nagnilalisay, nagsinumbagay
tungod sa iyang mga istorya
Nga matud pa, gama ra sa dila.
Apan, di nako mahikalimtan
ang adlaw nga siya giduulan
sa usa ka estranghero sa da’n.
Siya gitan-aw ug gibaharan;
“Mintras sayo pa, pag bag-o na, Nang.
Kay kon dili gani ka muundang,
chismis imo gyung pagamahayan
ug kini imong pagahilakan.”
Apan, wa gyud nituo si Tiya.
Wa gyud niundang ang iyang baba.
Sigeg tabi dinhi, tabi didto,
chismis abot hantud pikas kanto.
Lawom na tawon ang kagab-ihon.
apan si Tiya, naghulat gihapon
sa akong ig-agaw nga si Dodong.
Si Manay, misulod ug miingon.
“Piling, imong anak gipatay.”
“Wa koy panahon sa chismis, Manay.”
“Tinuod tawn ni!Piling , adto-a
didto daw sa Anghel Punerarya.”
—-
Henrietta Diana de Guzman is a 3rd year BA English Creative Writing student of UP Mindanao.