Mohawa ko, mopalayo,
Gukdon ang tartanilla nga nagbiya nako,
Magpaanod sa mga balod,
Magpadala sa huyop sa hangin.
Ang saad nga magpabilin
nalubong na sa mga balas daplin sa dagat,
Apan ikaw gihapon ang padulngan ug balikan,
kon agakon ako sa kamingaw.
Ug kon malimot man ako
sa kaalam na imong gitudlo,
Subayon ko ang dalan
nga nagpasinati nako
sa gugma nimong walay sukod.
Dayga ko sa paglakaw,
Ug gaksa ko sa pagbalik.
Si Princess Mary Juliet L. Matin-ao gipanganak sa Baleguian, Jabonga, Agusan Del Norte, apan gatubo sa dakbayan sa Sugbo. Ang iyang interes sa pagsulat nagsugod niadtong elementary pa siya, apan napadayon pag junior high school diin usa siya ka estudyante sa Special Program in the Arts sa Don Vicente Rama Memorial National High School. Siya nag-eskuyla karon sa usa ka SUC sa Cebu isip 3rd year BSED English student, ug siya nanghinaot nga ang iyang hilig sa pagsulat, molambo ug magpadayon.