Kanindot diay ang molupad.
Ang makigduyog sa mga panganod.
Ang makigduwa sa mga pisik sa uwan.
Ang tanglaon sa mga mananap sa yuta.
Swerte kitang galupad-lupad…
Tungod di mabayran
Ang atung mga pakpak
Hilabi na ang atung abilidad nga labangon
Ang distansya sa oras ug panahon.
Swerte kitang dunay’ng mga pako
Tungod masukod natu
Ang kalay-on sa dagat ug yuta,
Malabwan ang nagkandataasang mga balay
Masinati ang bugnawng halok sa hangin,
Makigsayaw sa nagpahiyom nga mga dahon
Ug pamatud-ang di kinahanglan ang kwarta
Aron kita palakpakan ug kasinaan.
Swerte kitang dunay’ng hait ang sungo
Ug tag-as nga mga kuko
Tungod di na kinahanglan manglimos
Sa mga buaya ug ubang mananap og pagkaon.
Labaw’ng swerte ta…
Tungod di natu kinahanglan ang hunghong sa uban
Igo na ang atung mga kanta––
Mga awitong magpatulog sa mga lapsag inig kagabii
Ug magpahinomdom nga dunay kalinongan
Tunga niining kasaba sa kalibutan.
Luis Bahay is a Licensed Teacher at Tampakan, South Cotabato who loves to write poems especially in Binisaya.