Tag: Lester B. Argawanon

‘Ako si Don Carlos
Hari sa mga Moros
Bisan pila ka gatos
Hutdon ko ug gapos
Bandila nagkayab-kayab
Sundang nagkidlap-kidlap
Dugo nagbanaw-banaw
Sa yuta sa Mindanao’

Dili ang Kidlap sa Sundang,
Ang kagahapon nga nag-antus.
Dili Dugo ang nag-banaw,
Ang Luha sa Kamingaw.

Human sa mga pulong sa garbo,
Ang mga tingog sa kasakit mipatigbabaw.
Kinsa man gayud diay ang hari
Sa yuta sa Mindanao?

Mga istorya sa katigulangan,
Mga balak sa kagawasan,
Mga pag-ampo sa kalinaw,
Naglupad sa kahanginan

Dili hari, apan katawhan,
Nga nagbarog sa ilang yuta.
Dili gapos, apan paglaum,
Nga nag-pabilin hangtud utlanan

Human sa mga ngalan sa gahum,
Ang kamatuoran nag-abri
Ang Mindanao, dili lang sa sundang
Apan sa paghigugma kini walay undang

Human sa “Ako si Don Carlos,”
Ang pagpangita sa pagsabot nagpadayon.
Sa mga pulong nga wala gilitok,
Ang kamatuoran nagpaabot.

Lester B. Argawanon is a university instructor from Davao Oriental State University- San Isidro Campus (DOrSu-SIC), teaching language and literature. Balancing academia and creative writing, he draws inspiration from personal experiences, cultural roots, and the people who have shaped his journey. His poetry often reflects themes of memory, love, and the passage of time. This piece is inspired by his late father’s poem about Don Carlos.

“Balud sa kapalaran hunong na sa imo kanako’ng pagdagmal,” mao ang giawti ni Lola kanako. Gikanta niya kini agig paghandum sa mga balud nga mitamparus sa lapyahan.
Kadtong makabungol nga hadyong sa unos ug liti nga iyang natagamtaman.

Karon, nia siya. Hugot nga mikupot sa pisi nga gihikot sa duyan nga akong gisapnayan. Dungan sa pag-abri sa iyang mga ngabil, miuyon ang iyang mga tudlo sa pagtabyug niining gamay ko’ng lawas.

“Nalisang ako nga ibanlas sa baybayon,” siya mipadayon sa awit ni Max Surban. Iyang tingog daw hagawhaw ingon lang sa gapnud nga nagpalawud niining kinabuhia— walay hunong sa pagpasipala.

Didto, sa tumoy sa iyang awit, ako mitimbakuwas. Sa iyang kakurat, siya mikanta sa makusog, “Oh! Balud sa palad ko, hunong na intawon! Oh, hunong na!”Hinapos nga linya sa maong tukar nga hangtud karun, dili niya mahikalimtan.

---

Lester B. Argawanon is a university instructor from Davao Oriental State University- San Isidro Campus (DOrSu-SIC), teaching language and literature. His poetry often reflects themes of memory, love, and the passage of time.