“Ayaw na ko ihatod,
mahasol ra ka,” sulti nako niya
samtang gabitbit sa akong mga maleta
pagawas sa among purtahan,
nga karon iyaha na lang.
Guot na kaayo ning balaya
para namong duha.
Tulo ka-tuig na sad
ang milabay sukad gitistingan namo
isigo ang usa’g usa diria.
“Di na gyod ka magpapugong?”
sambit niya human gibuga ang aso
gikan sa iyang sigarilyo,
bisyo nga wa nako tuguti
sa sinugdanan–apan kadugayan
kay naandan na lang.
“Unsa pa ma’y dugayan?”
Tubag nako, dayon amin.
Gahulat na ang traysikel nga akong sakyan
padulong kanto,
padulong sa dapit nga layo
sa iyang mga aso.
Apan, sa akong mga kamot
magpabilin gihapon ang baho.
Jasmin C. Arcega is a Creative Writing student in UP Mindanao who loves chicken, ketchup, books, and Super Junior.