Tag: Ivan Ridge A. Arbizo

Naglupad-lupad
sulod sa plastik
nga botelya,
imo siyang gihabwa,
gibutang sa tugkaran

ug gihiktan iyang tiyan
og hilo samtang nagkapa-kapa
iyang mga pako gikan imong
gitangtang iyang mga tiil

hangtod imong gidugmok iyang ulo –
mibanaw ang lagom niyang dugo,
mihunob sa semento.

Naanad ka og panakop
sa mga alindanaw
samtang nagpabiling handomanan
ang kabagnotan
sa akong nahanawng pagkabata.

---

Ivan Ridge Arbizo finished his concentrations in Journalism and Humanities at Davao City National High School.

Sa di pa mutikang kining mga tiil sa orasan,
tagbawon sa kilom-kilom ang dakbayan
sa akong nabatian, makabungol kining kampana
sa matag bagting niining hinagubtob sa dughan.

Kon ngano wa pa ko makauli, di ko kaingon.
Basin imong kalimutaw ang mga posteng
akong malabyan: gasidlak-sidlak, ginasubay
ang dalang hagbay rang gibusdik
sa akong mga kasaypanan.

Kon ngano sige ko’g kasaag, di ko kaingon.
Basin imong tutunlan ang dalan kon asa
ang mga buot kong ibutyag alang kanimo
nagkaguliyang ra sama sa mga sakyanan.

Apan, inig hunong nako sa kanto,
magpabilin ang kahait sa kadulom
nga hagbay rang gibaid
sa atong kagahapon.

Nanirado na diay tanang tindahan.
Ug gikandado na sab sa kahilom
ang akong mga gibati alang kanimo.

Nakauli nako.

 

---

Ivan Ridge A. Arbizo hails from Davao City.

alang kang K.J.T

ang gimapa sa mga bun-og nga nadawat
sa usa ka sipi sa saging nga nagpungko
ibabaw sa taya-ong kaldero.

kini ang gitutokan sa nikaging nga butiki
gikan naipit sa pultahan o di ba kaha
ang mga listong naghikog sa halayan.

apan, kini sab baya ang kandilang natunaw
diha sa sam-ang sa imong dughan; ang luhang
hangod karun, namintana gihapon

dinhi sa akong mga mata.

---

Ivan lives in Davao City