Mangingisdang way bangka,
Mga mag-uumang way guna,
Syorbol sa lista
Diez mil, bugas, paypay, ug uban pa.
Kuko di kyutiks, buhok deplantsa.
Selpon pay imo, mga branded,
Pareho ang kolor sa sanina.
Aha man kunoy nabuktot ug ginuna?
Namuypoy ang kamot binira sa pukot way kuha?
Sumala, biyo ragud adtong bagsakan,
Tawn, ang mga gakagidlay,
Nangyawat, nangkulong okra, talong buslot, saluyot nga nagkulismaot, mahalin.
Naa anang balisbisan naghanig ug karton,
Nanag unlan ug buyot,
Nagabalukot ug panaptong buslot.
Way alamag sa linya,
Way natiting diez mil, bugas ug unsa pa diha.
Gani, wa masihid sa lista.
Apan mao kadto sila,
Ang nangyawat,
mao-mao rang abot sa yuta,
namasin mahalinan,
ang kanunayng hangyuon,
bugawon, pagalabyan,
gakamuritsing, nagkurog ang tiyan,
naga ampo, makasapi,
baligya mahalin,
makapalit ug asin, bugas, ug maka buenas, delata. aron sa pagsawp sa adlaw, may madawdaw,
aron pag hikyad sa hapin,
balunon sa kahinanok
ang pamasin,
kabag-uhan,
kaharuhay,
ug paghatag nila’g bili
sa atong katilingban.
Nga unta sa sunod, sa linya mahisulod.
1. Giuklab
Giuklab ang taklob sa kaganina rang alas-singko sa kadlawng nilung-ag,
Ug gihakop sa kubalong mga kulamoy ang namidpid nga mumbo ug dukot anang ngilit sa lubot sa kalderong putol ang kawo.
Maoy gi pares sa nabiling bahaw ang mga tinalagtag nga nanga punggung ulo sa sinugbang bulad-tamban.
Sanglit, nangita ang dila ug parat nga maoy maka tuklod sa hagashas nga kan-un.
Ang katulo gibahin nga usa ka paketing kape, gibubo anang tasang tipak, gikutaw, apil ang duha ka kutsarang pulang kamay nalukop ug atitod.
Sa iyang tutunlan, nagsumpaki ang katam-is ug kaparat.
Naghulat molugdang ang tinagiktik nga tulo ka kumkom nga pagkaun sa naghilab nga tiyan.
Dayo’g lukot sa dahon sa lumboy, gitabako.
Ang bulhot sa aso, naka tigaw sa makanunayong talan-awon sa udto:
Ang panglunhaw sa bag-ong dinarong yuta, ug ang padayong pakigbisog sa abuhong natad sa dakbayan.
Kay bisan sa adlawng ipagpahulay, gihikaw ang nihit nga diska
Hermi Matunhay Dico teaches Humanities and Culture and Arts Studies courses at the MSU-Iligan Institute of Technology. He was a fellow to the Cultural Center of the Philippines’ Production Design and Technical Theatre Management Training Program; the Iligan National Writers Workshop (INWW) for his works in Cebuano Poetry; SulatDula Playwriting Workshop in Xavier University; and the University of San Carlos’ Faigao Writing Fellowship. Some of his balak were anthologised in Dagmay, Mindanao Harvest 4 and the Proceedings of 17th INWW. Two of his one-act plays were staged by the IPAG in 2017, 2021, and 2023 respectively where he was also a fellow of TranSRIPT, a Playwriting Master class in 2021 and 2023.