Ali diri mag lingkud-lingkod ta sa lapyahan sa baybayon
Ug atong asuyon ang kinabuhi.
Tan-awa ang usa ka sakayan nag utaw-utaw sa dagat
Gianod ug gihampak sa dagkong bawod.
Ug gihuyop sa makusog nga huros sa hangin.
Apan luyo sa unos naningkamot gihapon
Makadunggo nga malipayon sa baybayon.
Tan-awa usab ang kawayan.
Bisan gibul-ogan sa makusog nga baha
Ug gibawog sa makusog nga hangin,
Apan igo lang kining miduko ug minggonit ang gamot.
Pagsubang sa adlaw mingbalik pagbarog ug nagpabiling lig-on.
Tan-awa ang mga langgam sa kahanginan
Daw gitabyog ug gipadpad sa huros sa hangin
Wala silay dakong kamalig alang sa ilang pagkaon,
Apan nagpabiling malipayon nga naglukso-lukso sa kahoy.
Ang bulak nga mitubo sa tampi sa pangpang,
Nangalimyon ang kahumot nga modani sa mga alibangbang.
Ang bulak nga magdala og kalipay sa tawong masulub-on
Apan sa pagsalop sa adlaw hinayhinay
Kining motikyup ug mawad-an sa kaanyag,
Maluya kini ug malawos
Sama sa atong kinabuhi.
Erlougie Tabigue is a Bachelor of Secondary Education graduate, majoring in Science, from Davao Oriental State University, currently residing in Brgy. Mamali, Mati City, Davao Oriental.