Paraiso sa Haw-ang nga Basiyo

Poetry by | March 3, 2025

giunsa—
nga adunay mas humok nga kaunoran kay sa waks
mga bukog hinimo gikan sa punoan sa bulak
gininhawa’ng mas malumoy pa sa bula—
nako pagpadayon sa paglatagaw
nga may abohang nagpungko sa akong kinauyokan?

napasmo’ng kalayo
daw hapit na mamahuway sa mga bukton sa kamatayon
bisan pa kanunay nga nag-alingasa ug nagsipasipa
batok sa tanan klaseng pan-
ensaymada hinaon gikan sa langitnong pugon
monay hinaon gikan sa baba sa mga manggialamon

andam mulamoy sa tanan
bisan ang adlaw, bulan, kabituonan
ibalik ang kangitngit gikan sa tagoangkan
kung asa niguwa ang tanan

ug kung haw-ang na ang sudlanan,
dayon… buk-a ang basiyo
atubangan sa tindahan—
Paraiso.


Carmel Earl Palabrica is an AB Literature and Cultural Studies undergraduate at the University of Southeastern Philippines. She is an active member of Lantaka, the university’s theater group, and a freelance digital artist.

Si Bayang, Naliso

Poetry by | April 1, 2024

kung ilabyog ni Bayang iyang bat-ang
muatras ug abante
daw bawod nga gatamay
sa panit sa baybay
ang kalibutan
sa ilawom sa iyang tiilan.

samtang nagbitaybitay,
samtang nagtabyog-tabyog,
galutaw iyang buhok
sa awaay nga iyang nasunggal.
Iyang utok? Nagtambling,
Nagligid-ligid.

sa matag piyok sa uwak nga nagpatong
sa taas sa iyang hubonan,
iyang ginaihap pipila pa ba ka sikaran sa impyerno
bag-o niya masikaran ang panuway sa panganod…


Carmel Earl Palabrica is currently an undergraduate student at the University of Southeastern Philippines pursuing a degree in Bachelor of Arts in Literature and Cultural Studies.