sa una, init imong sabaw
may balanse ang katam-is ug kaaslom
may sahog nga kusog makapabaskog
sa panglawas ug balatian
ug may pagmahal ang matag halad
ug sa una, init imong sabaw
sa una, kada adlaw’ng matagamtaman
imong lami-an nga sabaw
pangpainit sa nagkurog kong kaunoran
tunga sa pagbunok sa ulan
sa matag higop ko, di malikayan ang pagbalhas
sa singot nga muanod sa kahago sa kinabuhi
apan milabaw ang mga adlaw
wa malikayi napan-os imong sabaw
bugnaw na ug mupatigbabaw na ang kaaslom
ang kahumot nga kanhi kong madimdim
ang katam-is nga daw gihalad sa mga anghel
wa ko na makaplagi sa mangkok sa imong sabaw
basin may laing kamot ang nikawkaw
o imong gihalaran sa imong sabaw
bisan unsaon og init ang bahaw
ug bugnaw mong sabaw
sa pagkapan-os kini mipaingon
hangtod ilabay na lang sa lubnganan sa kagahapon
—
Bejay Absin works full-time in a call center and is involved in theater. He loves to cook.