Dili mokanta ang kulasisi;
hinuon, magdikit ilang balahibo
samtang nagdula sa sanga,
maghunghong og tingog
nga para ra sa usa’g usa.
Nag-ambit-ambit og santol
gikan sa punuang ilang gibisita,
samtang nagtimbaya og pahiyom,
mahilayo sa tanang makakita.
Magsinukduhay og dula
ug sa kasambungan magtago,
sama sa ka magtiayong anaa
sa landong ra magtagbo.
Sa matag lukso padulong sa lain,
ilang mga pako moagik-ik og katawa,
apan kon naa’y tingog nga mosangpit,
kalit lang silang mawala.
Si John Carlo Patriana Beronio usa ka magbabalak gikan sa Cagayan de Oro City.